Modalaw ra unta sa iyang kapuyo ang 17 anyos nga dalaga nga taga Barangay Duljo, Dakbayan sa Sugbo apan nabalhog na hinuon kini sa susamang pasilidad human kini nakuhaan og linikit nga mga pinaugang marijuana.
Ang 17 anyos nga babaye, nagsabak pa gyud nga nasakpan nga naghupot og illegal nga drugas nga gisuksok sa iyahang bra sa Cebu City Operation Second Chance Center sa Barangay Kalunasan, Dakbayan sa Sugbo.
Nasayran nga niadtong Huwebes, Agusto 22, dihang nakuhaan og 14 ka mga linikit nga marijuana ang maong dalaga nga unta moduaw sa iyahang kapuyo nga anaa usab sa maong rehabilitation facility.
Tungod sa kadudahan nga lihok niini ug kay wala kini mahimutang, atol sa pagrekisa niini sa usa sa mga house parent, giingon ng wala dayon mosanong ang dalagita hinungdan nga giingnan nalang kini sa tigbantay nga babaye nga ipahubo ang iyang bra.
Atol sa paghubo sa bra niini, nasuta nga aduna diay kini gisuksok nga mga linikit nga mga pinaugang mga marijuana.
Matod pa sa maong 17 anyos nga daw gisugo ra siya sa iyang kapuyo sa pagpalusot sa maong marijuana.
Ang maong suspek mag-atubang og kasong paghupot og illegal nga drugas o kalapasan sa Section 11, Article 2, RA 9165 o Comprehensive Dangerous Drugs Act of 2002. / DVG