17 ka Pinoy nga gi-hostage sa Yemen sa 2023 gibuhian

Human sa kapin sa usa ka tuig, ang tanang 17 ka Filipino seafarers nga gi-hostage sa mga rebeldeng Houthi sa Yemen gikatakdang mobalik sa Pilipinas, sa pahibalo ni Presidente Ferdinand "Bongbong" Marcos Jr., niadtong Miyerkules, Enero 22, 2025.

“It is with utmost joy that, after more than a year of captivity in Yemen, I announce the safe release of all seventeen Filipino seafarers, together with the rest of the crewmembers of M/V Galaxy Leader,” matod ni Marcos sa iyang opisyal nga pamahayag.

Gikumpirmar sa Presidente nga ang mga seafarer anaa na sa pag-atiman sa Philippine Embassy sa Muscat, Oman, ug sa dili madugay makig-uban sa ilang mga pamilya sa nasod.

Gipasalamatan ni Marcos ang Sultan sa Oman nga si Haitham bin Tarik ug ang Omani government sa pagpataliwala sa mga negosasyon sa kaluwasan sa mga tripulante.

Gidayeg usab niya ang mga paningkamot sa mga ahensya sa gobiyerno ug pribadong organisasyon sa Pilipinas kinsa nagtrabaho sulod sa kapin sa 429 ka adlaw aron masiguro ang positibo nga resulta.

Ang cargo vessel nga M/V Galaxy Leader gi-hijack sa mga rebeldeng Houthi duol sa Hodeidah, Yemen niadtong Nobiyembre 2023 samtang nagpadulong sa India.

Ang 25 ka mga tripulante niini naglakip sa 17 ka Filipino, uban sa ubang nasyonalidad sama sa Bulgarians, Ukrainians, Mexicans, ug Romanians.

Ang barko nga nalambigit sa usa ka kompanya sa Israel apan gipadagan sa Nippon Yusen K.K. sa Japan, gi-target tungod sa gituohan nga pakig-uban sa Israel taliwala sa nagpadayon nga panagbangi sa Hamas-Israel.

Una nang gipasalig sa mga rebelde nga dili nila hilabtan ang ilang mga hostage, apan nihangyo nga tapuson na ang gubat sa Gaza sa dili pa nila buhian ang barko ug ang mga seafarer.

Gikundena sa gobiyerno sa Pilipinas ug Japan ang maong insidente. / JGS / SunStar Phi­lippines