Nabungkag sama sa lampinig ang mga sugarol atol sa pagpangronda sa kapulisan sa lungsod sa Liloan sa tulo ka managlahing mga tigbakayan niadtong Huwebes ug Biyernes Santo, Marso 28 ug 29, 2024, nga niresulta sa pagkasikop sa 17 ka mga tawo.
Unang gironda mao ang gipahigayon nga tigbakay sa Barangay Poblacion ug Barangay Catarman sa Huwebes Santo, Marso 28, 2024.
Gisundan pa kini sa Biyernes Santo, Marso 29, human nga gialarmahan ang laing tigbakay sa Barangay Tayud.
Nasakmit sa mga polis ang mga manok panabong lakip na kadtong mga bihag ug ang mga buwang niini.
Matod ni Police Major Eric Gingoyon, hepe sa Liloan Police Station, nga ilang gipang monitor ang illegal gambling activities sa ilang lungsod ilabi na nga nakadawat na sila og impormasyon nga mosiaw gyud ang tigbakay panahon sa Semana Santa.
Kasamtangan nga gipangbalhug sa Liloan Custodial Facility ang mga sugarol ug giandam na ang kasong kalapasan sa Presidential Decree 1602 o Prescribing Stiffer Penalties on Illegal Gambling karong adlawa, Abril 1, 2024. / AYB