Mopakatap ang Lapu-Lapu City Police Office (LCPO) og kapin sa 1,700 ka police personnel ug force multipliers sa dakbayan alang sa pag-host sa Ironman 70.3 triathlon karong Dominggo, Abril 21, 2024.
Ang mga partisipante gikan sa ubang kanasuran molangoy sa Mactan Channel, magbisikleta agi sa Cordova paingon sa Cebu-Cordova Link Expressway (CCLEX) nga motapos sa utlanan sa South Road Properties tali sa Cebu City ug Talisay City, ug mobalik sa CCLEX ug Lapu-Lapu City aron pagtapos sa lumba.
“Ang kulang nato mao ang pag-implementar sa plano, maghuwat na lang ta sa D-day,” matod ni Police Col. Ali Baron, Lapu-Lapu City police director.
Seguruhon sa mga polis ang kaluwasan sa mga motan-aw.
“Ang atong gibuhat mao ang padayon nga mobile patrolling sa lugar, atong ma-maximize ang mga personnel labi na sa Mactan area,” saysay ni Baron.
Magbutang usab og mga security personnel sa mga beach resort ug tourist sites sa Lapu-Lapu City, diin mag-estar ang mga partisipante ug ilang mga kauban.
Moabot sa 1,500 ka mga bisita gikan sa sulod ug gawas sa nasod ning-abot na sa Sugbo ning semanaha alang sa triathlon.
Matod ni Baron, magpadayon ang proseso sa deployment karong Sabado, Abril 27, alang sa Battle of Mactan.
Si Presidente Ferdinand “Bongbong” Marcos Jr. ug uban pang dagkong mga opisyal sa gobiyerno apil sa giimbitar nga motan-aw sa kalihukan nga nagpakita sa reenactment sa gubat tali nila ni Magellan ug Lapu-Lapu, ang labing unang sa mga lumad batok sa langyaw nga mananakop. / DVG