Gipugngan sa mga inspektor sa Immigration sa lainlaing mga entry point sa Pilipinas ang pagsulod sa 171 ka mga langyaw nga adunay kanhi kombiksyon o pagkalambigit sa mga krimen sa sex sa miaging tuig, taho sa Bureau of Immigration (BI) kaniadtong Biyernes, Enero 5, 2024.
Sa usa ka pamahayag, si Immigration Commissioner Norman Tansingco niingon nga kining mga langyaw gibalibaran sa pagsulod subay sa immigration act, nga nagdili sa pagsulod sa mga langyaw nga “konbiktado o giakusahan sa mga krimen nga naglambigit sa moral turpitude.”
Gihatagan og gibug-aton ni Tansingco ang seryuso nga risgo nga gipahamtang sa mga indibidwal ngadto sa kababayen-an ug mga bata, nga nisangpot sa ilang paglakip sa blacklist sa undesirable nga mga langyaw aron mapugngan ang umaabot nga pagsulay sa pagsulod sa nasod.
Ang mga rekord nagpadayag nga kadaghanan sa mga sex offender mga Amerikano, nga adunay gidaghanon nga 129. Gisundan sila sa 15 ka Briton, upat ka Australiano ug upat ka Irish.
Ang listahan naglakip usab sa duha ka German ug duha ka Chinese nationals.
Sa 171 ka mga langyaw, 153 ang gibalibaran tungod sa pagkarehistro nga sex offenders (RSO), samtang ang uban nag-atubang og mga kaso nga may kalabutan sa mga krimen sa sex o mga subject sa mga reklamo alang sa susamang mga kalapasan.