Usa ka lalaki nga taga Arizona gisikop kay nilabay og sex toy ngadto sa crowd sa usa ka duwa sa Women’s National Basketball Association didto sa Phoenix, Arizona.
Mao kini ang pinakabag-o sa sunodsunod nga susamang insidente nga nahitabo sa managlahi nga arena sa liga sa milabay nga pipila ka adlaw.
Sumala sa mga pulis, ang 18-anyos nga suspek nikuhag sex toy gikan sa bulsa sa iyang sweater atol sa duwa sa Phoenix Mercury batok Connecticut Sun ug milabay niini padulong sa mga lingkoranan sa iyang atubangan.
Mitug-an ang maong lalaki sa mga pulis nga kini usa ra ka “prank” nga trending sa social media, ug iyang gipalit ang maong butang usa ka adlaw sa wala pa ang duwa aron dad-on kini sa arena.
Gidakop ang lalaki tungod sa suspetsa nga nakasala sa assault, disorderly conduct, ug public display sa explicit sexual material.
Sa milabay nga semana, daghang sex toys ang giitsa ngadto sa court sa mga duwa sa Atlanta, Los Angeles, ug Chicago.
Sa Los Angeles niadtong Miyerkules, usa ka sex toy ang mitugpa duol kang Indiana player Sophie Cunningham.
Ang WNBA players mikondernar sa mga panghitabo kay kini bastos nga lihok ug makadaot sa seguridad sa mga magdudula ug fans. / RSC