Gitabangan og kulata sa 11 ka mga batan-on ang 18-anyos nga lalaki nga nanalipod sa iyang inahan nga biktima sa verbal harassment.
Ang biktima kuyog sa iyang kauban sa klase pagpauli paingon sa ilang balay mga alas 11:30 sa gabii sa Pakpakan Road, Barangay Basak, Dakbayan sa Lapu-Lapu niadtong Lunes, Agusto 4, 2025, dihang giatake sa grupo.
Ang inahan sa biktima nga si alyas Kristine nipasabot nga ang pag-atake resulta sa unang insidente sa Hulyo dihang nagdumili siya paghatag og libreng sabaw sa iyang gitrabahuan ngadto sa grupo.
Gitug-an ni Kristine nga ang grupo nitunglo kaniya ug ang iyang anak maoy nakig-atubang kanila.
Ang biktima nakaangkon og mga pangos ug bun-og sa iyang baba, tuhod, bat-ang, ug ulo.
Nireklamo siya nga nalipong ug dili maayo ang iyang gibati human sa pag-atake.
Ang Gender and Development focal person sa Basak, Joan Bolondro, niingon nga si Kapitan Jasmine Marie Chan mohatag og tabang medikal ngadto sa biktima.
Gikumpirmar sab niya nga nasikop ang duha ka menor de edad, 16 ug 14 anyos, nga taga Suba Masulog ug Sudtunggan sa Basak, kabahin sa pag-atake
Ang 16-anyos nga giinterbyu niangkon nga didto siya sa lugar apan nihimakak sa pagkalambigit sa pag-atake. Duna siyay dalang kutsilyo apan nangatarungan nga iya kining nakit-an duol sa usa ka kapilya.
Ang 14-anyos nga bag-o lang gibuhian gikan sa homecare niadtong Agusto 1 tungod sa pagpangawat, nangatarungan sab nga igo ra siyang nagtan-aw sa pagpangatake.
Ang duha gitakdang ibutang sa homecare ug gipaabot ang pagtugot sa ginikanan, samtang subayon kinsa ang laing siyam ka mga batan-on nga apil sa grupo.
Samtang, tulo ka mga menor de edad, nga nag-edad og 12-13 ang gibutang sa homecare human giatake ang laing 13-anyos sa laing insidente niadtong Agusto 2 tungod sa pasangil nga love triangle.
Ang insidente nga nakuhaan og video sa kamera, nakadani sa atensyon ni Chan nga nisangpot sa pagbutang sa mga menor de edad sa homecare facility alang sa disciplinary action.
Niadtong Agusto 5, si Bolondro niingon nga padayong gipangita ang ikaupat nga menor de edad nga nalambigit sa pasangil nga pagpangulata. / DPC