Adunay 18 ka mga opisyal nga kandidata alang sa Binibining Lapu-Lapu 2023 pageant, usa sa mga kalihukan nga gipaabot sa kapistahan sa patron sa dakbayan, ang Birhen sa Regla.
Gipaila-ila niadtong Sabado, Oktubre 21 ang maong mga kandidata atol sa sashing ug press conference nga gihimo sa Waterfront Airport Hotel and Casino, Mactan.
Si Lapu-Lapu City Mayor Junard ‘Ahong’ Chan maoy nangulo sa kalihukan, nga gitambungan ni former city councilor Queenie Malingin-Amman, ug kadagkuan sa Waterfront Airport Hotel and Casino, Mactan.
Nakadaiyang mga adbokasiya ang gisuportahan sa mga kandidata diin nag-una na ang tinguha sa pagpalambo sa turismo, pagpanalipod sa kalikupan, women empowerment, kabataan, mental health ug uban pa.
Nahimuot si Mayor Chan sa plataporma sa mga kandidata nga siguradong makatampo sa kalambuan sa Lapu-Lapu City, tungod niini nisaad siya nga mopaluyo sa ilang tagsa-tagsa ka mga tinguha.
Sa Nobiyembre 20 maoy coronation night nga ipahigayon sa Hoops Dome, Brgy. Gun-ob.