Mokabat sa 18 ka mga indibidwal, kinsa nangangkon nga nailad sa usa ka babaye nga giingong nangilad kanila sa pagbaligya og yuta ug nakakuha kanila og P4.8 milyunes, nangayo og tabang kang Lapu-Lapu City Mayor Junard “Ahong” Chan niadtong Lunes, Pebrero 19, 2024.
Matod sa mga buyer, tagsa-tagsa nilang gibayran ang kinatibuk-ang P4.8 milyunes kang Glen (dili tinuod nga ngalan) sa pagpalit sa 1,400 metro kwadrado nga yuta sa Brgy. Canjulao.
Apan wa sila kahatagi sa suspek og tukmang mga dokumento sa deed of sale.
Ang Kagamhanan sa Dakbayan sa Lapu-Lapu nagdumili sa pagbutyag sa kompletong impormasyon kalabot sa suspek hangtod nga dili pa mapasaka ang kaso.
Dugang pa, pipila sa mga biktima nitaho nga gitikasan sila ni Glen sa ilang kuwarta niadtong 2022 ug wala pa iuli human siya napakyas sa paghatod sa mga dokumento sa yuta.
Gi-post sa suspek ang iyang mga yuta nga gibaligya sa Facebook, nga nagsaad nga kini mapalit pinaagi sa staggered payments sa barato nga presyo.
Giasoy sa mga biktima nga si Glen adunay kauban nga si Mark nga maoy iyang ahente.
Giimbitar silang duha ni Chan niadtong Lunes aron ipasabot ang nahitabo, apan si Glen ra ang nitungha.
Sa tigom niadtong Lunes, nasuta nga aduna pay pending nga kaso ang nahisgutang yuta alang sa pagbawi sa titulo niini sa korte.
Dugang pa, atol sa verification gikan sa Register of Deeds sa Siyudad, walay yuta nga narehistro ubos sa ngalan ni Glen sulod sa Lapu-Lapu City.
Gimanduan ni Chan si Glen nga mobalik sa iyang buhatan uban sa giingong kauban niini nga si Mark niadtong Martes, Pebrero 20, ug iuli ang kuwarta sa mga biktima.
Kon sila mapakyas sa pagbuhat niini, ang Siyudad mopadayon sa kaso batok kanila.
Sa chat message nga gipadala sa SunStar Cebu niadtong Martes, si Marky Bautista, Lapu-Lapu City Public Information Officer, namahayag nga sila si Glen ug Mark napakyas sa pag-uli sa kuwarta.
Gihisgutan ni Chan nga ang duha ka mga indibidwal mahimo’ng mag-atubang og legal nga mga kalapasan tungod sa paghimo og large scale estafa ug sa paglapas sa Republic Act 10175 o ang Cybercrime Prevention Act of 2012 tungod sa ilang pagpanikas nga mga post sa mga kabtangan nga gibaligya.
Gibutyag usab ni Chan nga si Glen adunay kasaysayan sa pagpangilad sa mga tawo pinaagi sa pagpamaligya og peke nga mga lote.
Iyang gitug-an nga usa ka residente nga gihinganlan og Jasper nibayad kaniya og P1.2 milyunes alang sa lote, nahibaw-an nga wala marehistro ang pagpanag-iya ubos sa iyang ngalan pinaagi sa Register of Deeds.Niadtong 2023, miduol si Jasper sa opisina ni Chan aron mangayo og tabang.
Bisan tuod sa kadugayan giuli ni Glen ang kuwarta ni Jasper, gipasidan-an siya ni Chan nga dili na usbon ang maong mga ilegal nga buhat.