19 anyos nga babaye missing; bag nakit-an

Lapu-Lapu City, Cebu map.
Lapu-Lapu City, Cebu map. (Google Maps)

Di matukib karon ang ka­ba­laka sa pamilya, kaparyentihan ug kahigalaan sa usa ka 19 anyos nga kolehiyala nga missing ug bag na lang niini nga dunay mga identification (ID) card ug cell phones ang nakit-an sa Marcelo Fernan Bridge o 2nd Mactan Mandaue bridge nga habig sa Brgy. Pusok, Siyudad sa Lapu-Lapu.

Ang gitaho ngadto sa kapulisan nga missing mao si Niña Fuentes Arpon, taga Brgy. Ilihan, Tabogon, amihanang Sugbo, first year nga tinun-an sa Cebu Technical University (CTU) Consolacion campus, kasamtangang nag-abang sa Brgy. Pagsabongan, Siyudad sa Mandaue.

Matod ni Ryan Pialago, first degree cousin ni Niña, sa interbyo sa Superbalita Cebu pinaagi sa telepuno sa Lunes, nga napahibalo sila sa hitabo sa alas 2 sa kaadlawon sa Dominggo, Pebrero 25, 2024 human nakit-an ang bag sa iyang ig-agaw.

Ang nakakaplag mao ang mga lalaki nga magbarkada nga nahiagi sa bridge.

Human sa paglabay sa 24 oras sa Lunes, ila na kining gi-report sa kapulisan.

Matod ni Pialago nga ila na kining gipa blotter sa Mandaue Police Station 5 apan nasuta nga ang bag didto makit-i sa Brgy. Pusok hinungdan nga iya pud nga gipa blotter sa Lapu-Lapu City Police Station 5.

Si Pialago nagkanayon nga may CCTV sa area nga na-record si Niña nga naglakaw apan wa na makuha ang dapit sa iyang paglapas sa nakuha sa camera.

Hinuon matod niya nga ang Maritime Police iya na usab nga gipahibawo.

Ilang gisuwayan sa pagsusi ang Mactan Channel apan wa silay nakita.

Wa nila gisalikway ang posibilidad nga gidala og usa ka tawo ang iyang ig-agaw.

Samtang si Police Staff Sgt. Jessie Adulfo, desk office sa Lapu-Lapu City Police Station 5, nagkanayon nga wa silay nakuha nga mga CCTV footage sa dapit diin giingon nga nahabilin ang bag ni Niña.

Sa pagsuwat ning taho, wa pay update ang banay sa dalaga.

Bisan pa niini, padayon nga nag-follow-up ang kapulisan sa kaso. / DVG

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph