Mokabat sa 192 ka mga pamilya kun 671 ka mga individual ang apektado sa baha sa Brgy. Umapad, Dakbayan sa Mandaue tungod sa pagsuyla sa Butuanon River sugod niadtong Lunes sa hapon.
Bisan wa nag-uwan sa dakbayan, ang kabukiran sa Dakbayan sa Sugbo nga maoy tinubdan sa Butuanon River giulan og maayo sa Lunes sa hapon, Hulyo 15, hinungdan sa pagsuyla sa tubig.
Nagsugod ang pag bul-og sa baha ug niawas nga nakaapekto sa mga lumolupyo sa Purok Tambis, Brgy. Umapad, Siyudad sa Mandue.
Grabe ang baha kay duna gani mga dapit nga ang tubig niabot sa ikaduha nga andana hinungdan sa paglusad og rescue operations sa emergency responders sa siyudad ug sikbit nga mga barangay.
Nagsugod ang rescue operations alas 4 sa hapon hangtod na sa alas 9 sa gabii.
Nianang gabii niabot pa sa liog sa tawo ang giladmon sa tubig sa gibahaan nga dapit kay way kalutsan ang tubig.
Matod ni Julius Adolfo, radio operator sa Mandaue City Disaster Risk Reduction and Management Office (MCDRRMO), nga wa magpataka sa pagsulod sa dapit ang iyang mga kauban kay dunay mga live wire sa kuryente.
Matod pa ni Adolfo nga full force ang tanang mga responder nga gikan sa Brgys. Jagobiao , Cobacob , Pagsabungan, Basak ug Labogon ug Bureau of Fire Protection (BFP) rescue team.
Ang mga bakwit naa kasamtangan nga gipahimutang sa Umapad Elementary School sa pagsuwat ning taho.
Wa hinuoy naunsa tungod sa katalagman nga dala sa pagsige og uwan.
Niadtong Lunes usab, ang baha nakamugna sa kahuot sa trapiko sa dakbayan, apil na kadtong padulong sa Dakbayan sa Lapu-Lapu ug padung sa mainland. / FVQ