1st package sa CBRT 60% nga nakompleto

60 PORSYENTO: Niadtong Biyernes, Pebrero 16, 2024 naa sa 60 porsyento nang nahuman ang package 1 sa Cebu Bus Rapid Transit. / ARKEEN M. LARESMA
60 PORSYENTO: Niadtong Biyernes, Pebrero 16, 2024 naa sa 60 porsyento nang nahuman ang package 1 sa Cebu Bus Rapid Transit. / ARKEEN M. LARESMA

Ang unang package sa Cebu Bus Rapid Transit (CBRT) gibana-bana nga hapit na sa 60 porsyento nga nakompleto niadtong Biyernes, Pebrero 16, 2024, ug kini gikatakda nga mahuman sa sayong bahin sa Hulyo 2024.

Ang manager sa CBRT nga si Norvin Imbong mikompirmar niini nga ang phase 1 sa proyekto gilauman nga mahuman sa sayong bahin sa Hulyo 2024.

Mahitungod sa phase 2 ug 3, si Imbong niingon nga ilang gitinguha ang pagkuha sa gikinahanglang mga pagtugot aron masugdan ang proseso sa bidding.

Personal nga nihimo og on-site inspection si Imbong niadtong Biyernes aron sutaon ang kalambuan sa nagpadayong ci­vil works kalabot sa pagtangtang ug pagbalhin sa mga skywalk nga apektado sa CBRT project.

Kauban niya si Konsehal Jerry Guardo, chairman sa committee on infrastructure.

Gikataho nga si Konsehal Nestor Archival nipadayag og mga pagduha-duha mahitungod sa pagkompleto sa timeline sa CBRT nunot sa gipahigayon nga executive session aron matubag ang mga kalangay niini.

Niadtong Pebrero 7, si Archival nangamahan og resolusyon human sa privilege speech ni Konsehal James Anthony Cuenco niadtong Enero 10, 2024, nga nagpatugbaw sa mga isyo nga naglibot sa CBRT project.

Agi’g tubag sa pagpangutana isip sponsor sa executive session, si Archival niingon nga wala siya matagbaw sa diskusyon, nga nagpasiugda sa ilang tumong nga mapadali ang pagkompleto sa CBRT.

Atol sa executive session, ang kinatibuk-ang target nga petsa sa pagkompleto sa proyekto nga gipresentar mao ang Disyembre 31, 2027.

Ang tibuok nga proyekto sa CBRT naglagbas og 35.28 kilometros.

Ang Package 1 naglangkob sa rota gikan sa Osmeña Boulevard paingon sa Cebu South Bus Terminal, nga adunay kinatibuk-ang 2.38 kilometros, nga nailhan usab nga “trunkline.”

Ang Package 2 maglangkob sa rota gikan sa South Road Properties, Mambaling, sugod sa South Bus Terminal, nga nagtimaan sa pagtapos sa Phase 1.

Sa laing bahin, ang Package 2 North maglakip sa rota sa Escario, Capitol, ug Gorordo Avenue, diin ang tibuok nga bahin sa Package 2 mokabat og 10.8 kilometros.

Sa paghisgot sa mga timeline, si Archival niingon nga ang Package 1 giplanuhan nga makompleto sa una, ikaduha, ug ikatulo nga quarter sa 2023 apan nag-atubang og mga kalangan, nga nisangpot sa usa ka giusab nga target sa pagkompleto sa ikaduhang quarter sa 2024.

Ang mga package 2 ug 3 gitakda alang sa managsama nga pagkompleto sa ikatulo nga quarter sa 2023.

Kabahin sa package 2 civil works, si Archival niingon nga naglambigit usab kini sa land acquisition works nga gikatakdang sugdan sa third quarter sa 2024 ug magpadayon hangtod sa second quarter sa 2025.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph