Nalandig sa tambalanan ang duha ka tawo human naangol sa nahitabong vehicular accident sa managlahing dapit buntag sa Lunes, Hunyo 23, 2025.
Nitumaw ang unang disgrasya mga alas 6:00 pasado sa may dalan Governor Cuenco, Barangay Banilad, Dakbayan sa Sugbo ug usa ka pedestrian ang nabanggaan og motorsiklo dihang nilabang sa maong dapit.
Sa inisyal nga imbestigasyon, ang biktima nga nakaangkon og mga samad sa ulo ug kamot giila nga si Jerome Alato nga temporaryong nagpuyo sa Sitio Baca sa naasoy nga barangay.
Nisaysay ang biktima nga gikan siya sa iyang gitrabahuan nga gasoline station sa Gorordo Avenue ug padulong na unta mouli sa iyang giabangan nga balay sa Banilad.
Apan pag-abot sa dapit dihang molabang na, gisita siya sa mga enforcer sanglit delikado ang paglabang sa maong dapit.
Dihang nakadungog ang biktima sa tingog sa pito, nibalik kini sa agi ug wala nakabantay sa motor hinungdan nga nabanggaan.
Samtang alas 7:00 pasado sa buntag gitubag na sab kini og laing disgrasya, ug naangol ang usa ka lalaki nga nagmotorsiklo human kini giingong nabangga sa usa ka tricycle sa dan M.L Quezon sa Barangay Casuntingan, Dakbayan sa Mandaue.
Sa pakisusi sa kapulisan, giila ang drayber sa motorsiklo sa alyas nga “ Junjun” giingong nakainom o hubog apan nagmaneho gihapon.
Nagkanayon sab ang drayber sa tricycle nga si alyas ‘Leo’ nga kusog ang pagpadagan sa motorsiklo samtang niaksiyon siya og u-turn sa iyang tricycle.
Base sa mga saksi sa maong panghitabo, nakuyapan ang drayber sa motorsiklo human kini nabangga apan nakamata ra sab dayon. Gidala na sa tambalanan ang duha ka mga lalaki samtang padayong gisuta sa kapulisan ang mga nahitabong insidente. / JDG