Patay nang naugkat ang 2 anyos nga lalaki nga nahulog ug nalumos sa kanal niadtong Sabado, Enero 6, gawas sa ilang balay sa Sityo 3-H, Brgy. Basak, dakbayan sa Lapu-Lapu.
Ang kamatayon ni John Khean Pantulan sa Martes, Enero 9, lang nataho sa banay ngadto sa kapulisan.
Ang apuhan sa bata nga si George Pantulan niasoy sa dySS Super Radyo nga sa mga alas 10 sa gabii niadtong Sabado, Enero 6, naugkat niya ang iyang apo, pipila ka oras human nila nabantayan nga nawala ang bata.
Saysay ni George nga nianang hapon nakatulog ang iyang apo ug iyang gipatupad sa iyang asawa nga naghigda sa ikaduhang andana sa ilang balay.
Nibalik siya sa silong aron motan-aw og programa sa telebisyon.
Dangtan og mga 20 minutos, nisaka siya og balik ug iya na lang nabantayan nga wa na diha sa tupad sa iyang asawa ang ilang apo.
Gilibot na nila ang tibuok balay sa pagpangita apan wa nila igkita ang bata.
“Dugay kong nilusong sa tubig (kanal) kay nagtuo ko nga gidala (bata) sa amahan nga wa lang mananghid. Kay naa ra man diha (silingan ra) ang amahan mag-ulian panagsa,” matod pa ni Pantulan.
Nasayran nga usa ka tuig nang buwag ang mga ginikanan ni John Khean, ang iyang inahan 17 anyos pa lang samtang 23 anyos ang amahan.
Naglain na ang huna-huna ni George kay dako ang iyang pagtuo nga nalumos sa kanal ang iyang apo ug gituohang taw-an ang dakong kahoy sa likod sa ilang balay.
Ilabi na nga pulos namalibad ang amahan ug inahan niini nga wa nila gidala si John Khean.
Sud sa tulo ka higayon gisungasong ni George ang kanal una niya nakapkapan ang lawas sa iyang apo nga nagkulob sa lapukon nga kanal.
Dali nga gidala sa tambalanan ang bata apan gideklarar nga dead-on-arrival.
Nasayran nga ang waste water sa mga residente diha magpundo sa maong kanal tungod kay way lutsanan sa tubig ang maong dapit.