2 anyos nga babaye 1 sa patay sa aksidente sa CCLEX

Dos anyos nga babaye ang usa sa duha nga nangamatay sa pagkabalitok sa usa ka van for hire niadtong Sabado sa viaduct sa habig sa Cordova sa Cebu-Cordova Link Expressway (CCLEX).

Ning pagsuwat, pabilin pa usab nga wa mailhi ang ikaduhang babaye nga biktima nga namatay.

Ang duha nga nangamatay gipangdala sa managlahi nga mga ospital.

Apil sila sa 23 ka mga sakay, nga naglakip sa drayber van, nga gipangdala sa nagkadaiyang mga tambalanan sa mga dakbayan sa Sugbo ug Lapu-Lapu.

Nasuta usab sa imbestigasyon sa mga saksi, dashcam ug CCTV footage gikan sa CCLEX management, ang pagbuto sa tuo sa panguwahian nga ligid ang hinungdan sa aksidente.

Ang drayber nga si Christopher Dejeto Toñacao, 34, taga Tawason, Mandaue City gikustodiya na sa kapulisan alang sa pagpasaka og kaso. / DVG