2 biktima sa pagpamusil

2 biktima sa pagpamusil
DAPIT SA KRIMEN: Kini ang tricycle sa biktima sa pagpamusil sa riding in tandem sa national highway sa Barangay Cawayan, lungsod sa Dalaguete, alas 3:45 sa hapon, Martes Hulyo 2, 2024. / TAMPO

Duha ka mga lalaki ang biktima sa managlahing kaso sa pagpamusil niadtong Martes, Hulyo 2, 2024.

Alas 10:40 sa gabii, usa ka driver sa e-bike samdan ug nalandig sa tambalanan human maigo sa saag nga bala sa nagpabuto og armas sa Sityo Cabangcalan 2, Brgy. Bulacao, Siyudad sa Sugbo.

Ang biktima giila sa alyas nga ‘Bryan', hamtong, ulitawo, molupyo sa naasoy nga dapit.

Sa imbestigasyon sa kapulisan sa Inayawan Police Station pinaagi sa direktiba sa ilang station commander nga si P/Maj. Jecree Basitao, nasuta sa Superbalita Cebu nga ang biktima nagmaniho sa iyang e-bike pauli sa ilaha ug sa kalit lang may niabot nga usa ka motorsiklo nga kolor grey nga way plate number.

Ang duha nga sakay sa motorsiklo nag-helmet ug nag-jacket ug ang angkas nipabuto sa armas sa makadaghan nga higayon sa nagkalainlaing direksiyon.

Ang biktima naigo sa saag nga bala nga niresulta sa pagka angol ug gidali sa pagdala sa Cebu City Medical Center (CCMC).

Samtang padayon pa ang imbistigasyon sa kapulisan sa Inayawan Police Station aron mailhan ang mga gunman.

‘LOVE TRIANGLE’

Samtang, love angle ang gitutokan karon sa kapulisan sa pagpusil sa usa ka tricycle driver sa riding in tandem sa national highway sa Brgy. Cawayan, lungsod sa Dalaguete, alas 3:45 sa hapon sa samang adlaw.

Ang biktima 35 anyos nga ulitawo nga may kapuyo, nagpuyo sa nahisgutang da­pit.

Ang mga gunman mao ang nag-inangksay sa motorsiklo nga pulos nag-helmet.

Sa follow up sa Superbali­ta Cebu, nasuta pinaagi sa imbestigasyon sa kapulisan sa Dalaguete ubos sa kamandoan sa ilang hepe nga si P/Maj. Vincent Awit Zozobrado nga ang biktima may duha ka mga pasahero nga padulong sa Brgy. Poblacion apan pag-abot sa Cawayan, gitapdan kini sa nagmotorsiklo ug ang angkas maoy nipusil sa biktima nga naigo sa tiyan.

Suwerte nga way napagan sa iyang duha ka mga pasahero ug ang mga riding in tandem daling ningsibat sa direksiyon sa lungsod sa Argao.

Ang biktima nga wa mawad-i sa panimuot gidali sa pagdala sa Argao Bogo District Hospital apan, sumala sa kapulisan, wala kini mokooperar sa ilang imbestigasyon.

Apan ang kapulisan sa Dalaguete nagduda nga love angle ang motibo tungod sa ilang nasagap sa imbestigasyon bahin sa gikarelasyon sa biktima nga babaye nga giingon nga minyo. / DVG

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph