Nisaad ang Japan Boxing Commission (JBC) nga mopahigayon og imbestigasyon kabahin sa sunodsunod nga kamatayon sa duha ka mga boksidor nga parehong niaway sa sama nga boxing promotion batok sa lainlaing kontra niadtong Agusto 2, 2025, sa Korakuen Hall sa Tokyo, Japan.
Si JBC chairman Hagiwara Minoru ug Secretary General Tsuyoshi Yasukochi nagpatawag og press conference aron ipahibalo kining maong kalambuan nga gipanghinautan nga maghatag og katin-awan kabahin sa pagpanaw nila ni Shigetoshi Kotari niadtong Biyernes, Agusto 8, 2025, ug Hiromasa Urakawa pagkasunod adlaw.
Gikonsiderar kini nga labing masulub-on nga trahedya sa kasaysayan sa boksing sa Japan.
“We will begin work on anything we can immediately, including investigating and clarifying the cause and taking measures going forward,” pamahayag ni Hagiwara nga napatik sa Ring Magazine.
“We would like to move forward as quickly as possible.”
Si Kotari, 28, nakuyapan human sa away niini batok kang Oriental and Pacific Boxing Federation junior lightweight champion Yamato Hata nga niresulta sa 12-round draw.
Gipaubos sa emergency brain surgery si Kotari alang sa subdural hematoma apan namatay ra gihapon siya paglabay lang sa unom ka adlaw.
“Rest in peace, Shigetoshi Kotari. A warrior in the ring. A fighter in spirit. Gone too soon. Our thoughts and prayers are with his family, team, and the entire Japanese boxing community,” pahasubo sa World Boxing Organization (WBO) nga napatik sa AP News.
Niadtong Sabado, Agusto 9, nisunod sa pagkamatay si Urakawa sa sama gihapon nga pagkaangol human sa iyang 8-round TKO nga kapidihan batok ni Yoji Saito sa usa ka non-title fight.
Sa inisyal nga lakang, gianunsyo sa JBC nga ang OPBF ug WBO Asia Pacific title bouts ikunhod gikan sa 12 ngadto sa 10 rounds na lang.
Ang WBC ug Japan Professional Boxing Associate nakatakdang maghugpong karong Huwebes, Agusto 14, aron planuhan kon unsa pa ang angayang buhaton aron malikayan nga mahitabo pagbalik kining trahedya.
Kahinumdoman nga niadtong Disyembre 26, 2024, laing Japanese boxer nga si Kazuki Anaguchi, 23, ang namatay usa ka buwan human sa iyang 10-round decision nga kapildihan batok ni Seiya Tsutsumi.
Unya niadtong Mayo 24, 2025, si Ginjiro Shigeoka nagpabiling naa sa coma tungod sa nasinati niining brain injury human sa 12-round decision nga kapildihan niini batok kang Filipino world champion Pedro Taduran. / ESL