2 ex-con nadakpan na sab

WA MAG-USAB: Kay mibalik sa naandang bisyo ang duha ka mga kanhi binilanggo sa illegal drugs, ibalik na sab sila sa ‘Bahay ni Kuya.’ /
WA MAG-USAB: Kay mibalik sa naandang bisyo ang duha ka mga kanhi binilanggo sa illegal drugs, ibalik na sab sila sa ‘Bahay ni Kuya.’ / TAMPO

Duha ka drug personalities nga pulos nabutang isip priority regional level, ang nasikop sa buy-bust opera­tion sa mga sakop sa City Intelligence Unit sa Cebu City Police Office alas 12:10 sa Huwebes sa kaadlawon, Mayo 2, 2024, sa San Jose Village, Cabarrubias Street, Barangay Tisa, dakbayan sa Sugbo.

Ang mga suspetsado giila sa mga saksi nga silang Nhemrod Misa Inesola, 49, taga Adelfa Street, San Jose Village, Barangay Tisa ug Almar Bacalso Abejero alyas Mal, 24, taga City Central, Barangay Luz sa syudad sa Sugbo.

Nakuha gikan kanila ang mga dagkong putos sa gituohang shabu nga motimbang sa 105 gramos nga dunay standard drug price nga P714,000.

Matod ni Police Lieutenant Colonel Janette Rafter, deputy city director for administration sa Cebu City Police Office, ang duha ka mga suspetsado pulos nadakpan sa kaso gihapon sa illegal nga drugas ug pulos usab nabilanggo sa Cebu City Jail .

Si Inesola nabilanggo og pito ka tuig samtang si Abejero nabilanggo usab og lima ka tuig diin niadtong Nobiyember 2023 lang nakagawas sa bilanggoan.

Dugang ni Rafter nga inay magbag-o kay nakagawas na sila sa bilanggoan, mibalik na hinuon sa naandang bisyo nga mao ang pagpamaligya sa illegal nga drugas.

Dunay gipangtug-an ang maong mga suspetsado kon diin gikan ang ilang supply sa illegal nga drugas.

Apan giklaro ni Rafter nga ila kining ipaubos sa monitoring kon unsa ka tinuod ang mga pangangkon ug ang gipangbutyag aron mao na usab ang ilang sunod nga target sa operasyon.

“Naa na silay gipangsulti kung kinsa nga mao na sad ang atong sunod nga target kung masuta nato nga tinu­od,” matod ni Rafter.

Giandam na sa kapulisan ang kaso nga kalapasan sa Republic Act 9165 kun Comprehensive Dangerous Drugs Act of 2002 batok sa mga suspek. / AYB

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph