Duha ka mga lalaki ang napalga’ng gilabay nga patay na sa managlahing dapit sa lalawigan sa Sugbo sa Dominggo, Hunyo 30, 2024.
Usa ang nakaplagan sa daplin sa transcentral highway sa Sityo Goyo, Barangay Prenza, lungsod sa Balamban, Sugbo.
Si P/Lt. Col. Julius Garcia, hepe sa kapulisan sa Balamban, nangulo sa pagsusi sa dapit uban sa Scene of the Crime Operation (Soco) human nakadawat og alarma sa nakaplagang patay gikan sa concerned citizen, alas 10:50 sa buntag, Dominggo, Hunyo 30, 2024.
Gigapos og packaging tape ang duha ka tiil, gibaklid sa paggapos ang mga kamot ug di makita ang nawong kay giputos.
Sumala sa kapulisan, nagkadugta na ug baho na ang biktima ug gikuha na kini sa usa ka punerarya.
Wa pa kini mailhi ug ang kapulisan nanawagan sa publiko sa pagsusi kon walay missing nga sakop sa ilang pamilya.
Samtang, alas 2:50 sa hapon sa samang adlaw, ang kapulisan sa siyudad sa Talisay gipangulohan sa ilang hepe nga si P/Lt. Col. Epream Paguyod uban sa Soco, ang niresponde usab sa usa ka patay nga lawas sa tawo nga gituohang gi-salvage ug gilabay sa daplin sa karsada sa Sityo Campo 5, Barangay Manipis, Talisay nga nagkadugta na.
Nakapangutana ang kapulisan samtang ilang gisubay kon dili ba konektado ang krimen sa pag-salvage sa duha ka mga tawo.
Nagpadayon sa pagkakaron ang ilang imbestigasyon. / DVG