2 gidunggab, patay; gainom atol sa krimen

2 gidunggab, patay; gainom atol sa krimen
Malabuyoc, Cebu. (Google Map)

Duha ka mga tawo gipanunggab patay niadtong Dominggo, Hunyo 9, 2024 sa managlahing mga dapit sa lalawigan sa Sugbo.

Pulos hubog ang mga suspek ug mga biktima.

Usa ka mag-uuma patay nang nalandig sa tambalanan sa lungsod sa Malabuyoc, habagatang kasadpang Sugbo, human gidunggab ang iyang tiyan sa laing mag-uuma alas 5 sa hapon sa Dominggo, Hunyo 9, 2024.

Kini ang gibutyag ni P/Staff Master Sgt. Ronelio Duerme, chief investigator sa Malabuyoc Municipal Police Station, nga gikahinabi sa Superbalita Cebu, labot sa pagpanunggab nga nahitabo sa bukiran sa lungsod.

Ang kapulisan niila sa biktima nga si alyas ‘Juan’, 50, ug ang suspek nga alyas Pablo, 33, ulitawo apan dunay kapuyo.

Matod ni Duerme, ang duha managsilingan ug manahigala nga nag-inom apan sa dihang nangahubog na, nagkalalis na bahin sa manok nga igtatari nga gipabuhi sa biktima sa suspek.

Matod pa, ang biktima niuli sa ilang balay ug naglingkudlingkod sa hagdanan apan gibira ang tiil niini sa suspek kay buot pakanaugon.

Apan wa manaug ang biktima ug didto na gidunggab sa suspek ang tiyan gamit ang plamingko.

Ang biktima dali nga gidala sa tambalanan apan gideklarar nga patay nang niabot. Ang suspek nadakpan sa kapulisan.

MAGSUON

Manghod gidunggab patay sa maguwang nga gilupig sa sinumbagay alas 3:30 sa hapon sa Dominggo, Hunyo 9, 2024 sa Purok Thailand, Brgy. Li­bertad, dakbayan sa Bogo.

Ang biktima giila nga si Nestor Limpag, 43, minyo, kinsa gideklarar sa mga doktor nga dead-on-arrival (DOA) samtang nasikop si Benjie Limpag,46, minyo, maguwang sa biktima, usa ka construction worker.

Si Police Lt. Col. Joan Arnoco, hepe sa Bogo City Police Station, nibutyag sa Superbalita Cebu nga ang managsuon nakahurot og upat ka mga botelya sa ilimnong makahubog sa wa pa ang hitabo.

Ang biktima nag-uling samtang nakigtagay sa maguwang.

Apan samtang nag-inom ug nangahubog na, nagkalalis ug nagkainitay hangtod nga nagsinumbagay.

Sa ilang sinumbagay diin nalupig ang maguwang, kalit kini nga nakakupot sa sundang ug gihansakan niya ang lawas sa manghod hinungdan sa kamatayon.

Nasikop hinuon ang suspek human sa kremin.

Matod ni Arnoco nga nahitabo ang krimen gumikan sa kahubog sa duha nga pulos taga Masbate. / DVG, GPL

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph