Nabalian sa iyang tuong tiil ang usa ka 15 anyos nga lalaki sa dihang gipadasmagan og motorsiklo sa usa ka 17 anyos nga lalaki sa alas 3 sa kaadlawon sa Dominggo, Nobiyembre 12, 2023, sa Brgy. West Poblacion, lungsod sa Moalboal.
Sa imbestigasyon ni Police Master Sgt. Stewart Bayang, investigator on case, ubos sa kamanduan sa ilang hepe nga si Police Capt. Etelberto Timagos, ang 15 anyos nga biktima kauban sa laing menor de edad, nga pulos taga West Poblacion, Moalboal, nanuroy sa dapit.
Samtang, ang suspek nga 17 anyos taga taga Barangay Poblacion, lungsod sa Badian, didto usab.
Matod ni Bayang, ang 15 anyos ug iyang kauban nagkataw-anay, dihang ang suspek niduol ug gipangsumbag sila.
Usban pa unta sila apan gipugngan ang suspek sa laing 17 anyos nga lalaki.
Si Bayang miingon nga nanagan ang duha ka mga biktima sa kahadlok, apan gigukod sa suspek sakay sa motorsiklo ug sila gidasmagan.
Ang mga biktima gidala sa ospital samtang, ang suspek kay menor de edad, gi-rescue sa kapulisan ug gitugyan sa Department of Social Welfare and Development (DSWD ) office sa Moalboal.
Ang suspek nga gipangutana ni Bayang kon nganong iyang gipangsumbag ang duha ug gidasmagan og motorsiklo, kini nitubag nga siya gibugalbugalan, gikataw-an apan gihimakak kini sa mga biktima.