Duha ang gipamusil sa Dakbayan sa Sugbo sa sayo sa buntag sa Sabado, Abril 20, 2024 sa managlahi nga mga dapit.
Namatay ang 27 anyos nga DJ sa usa ka resto bar sa General Maxilom Ave. duol sa usa ka fastfood chain sa Brgy. Cogon Ramos, dakbayan sa Sugbo pasado alas 3 sa Sabado sa buntag Abril 20, 2024.
Ang biktima giila sa iyang mga kabanay nga si Junrey Garcis Jimeno, taga Mc Arthur Boulevard, Barangay Tinago, dakbayan sa Sugbo.
Sigun sa mga saksi nga ang biktima padung na mokuha sa iyang motorsiklo nga gi-park sa Jollibee apan gisugat siya sa nag-inusara nga gunman ug dayon gipusil tumong sa tangkugo.
Human sa pagpamusil, dali nga nisibat ang gunman sakay sa usa ka motorsiklo nga gimaneho sa laing tawo nga nagpaabot paingon sa norte nga bahin sa dakbayan sa Sugbo.
Kapulisan nakakuha og usa ka basiyo sa bala sa wala pa matino nga kalibre sa armas.
Sa imbestigasyon sa Abellana Police Station pinaagi sa pagpangulo sa hepe niini nga si Police Major Mark Don Alfred Leanza nga pasado alas 3 sa Sabado sa kaadlawon, sila nakadawat og tawag sa telepono nga dunay lalaki nga gipusil patay sa General Maxilom Ave.
Ilang naabtan ang biktima nga nag buy-od na nga patay.
Sa pasiunang pakisusi nga kuyog sa biktima ang iyang kauban sa trabaho nga nigawas sa resto bar.
Padung sila sa parking area samtang nagsunod ang iyang kauban, dihang kalit lang dunay lalaki nga mibutho nga nagsul-ob og itom nga t-shirt.
Giduol ang biktima ug gidul-itan sa pagpusil sa ulo hinungdan sa iyang pagka hagba.
Ang amahan sa biktima nga si Reynaldo Jimeno nga nahinabi sa sibyaanang dyHP nagkanayon nga duna silay gipangdudahan.
Matod niya nga selos o ba kaha dunay nasuya niini nga dili pa niya ikabutyag kon unsa sanglit didto lang niya kini itug-an sa mga polis nga nag-imbestigar.
“Ang ako lang nga mo surrender lang unta siya kay mao raman gihapon mamatay ra man gihapon na siya bisan wala mi kaila niya naa may Ginoo,” Reynaldo.
Gibutyag sa amahan nga lima ang iyang mga anak ug si Junrey ang ika upat nga bugtong lalaki.
Iyang gidugang nga nahimo usab nga DJ sa usa ka FM station sa siyudad sa Sugbo apan sa dihang mihawa siya, nagtrabaho na lang kini sa usa ka resto bar.
Naa na sa kustodiya sa mga imbestigador ang cellular phone sa biktima samtang gipang susi na ang mga CCTV camera sa dapit.
VENDOR
Mga alas 5:57 sa buntag, naangol ang usa ka vendor sa pagpamusil duol sa Taboan Public Market.
Sa taho sa sibyaanang dyHP, ang biktima giila nga si Junabel Torreon, 44, lab-asera sa Cebu City Fish Market, taga Brgy. Sawang Calero ning dakbayan.
Ang biktima natulog sa iyang folding bed dihang gipusil sa wa mailhi nga gunman.
Ang biktima nga naigo sa abaga gidala sa tambalanan.
Wa pa masayri ang motibo.