Duha ka mga drayber sa motorsiklo ang naangol sa managlahing aksidente sayo sa buntag sa Dakbayan sa Sugbo sa unang adlaw sa bulan sa Agusto.
Si Ramonchito Hinautan, 35 anyos, usa ka ride-hailing app driver nga taga Dakbayan sa Mandaue, ang giingong nakatagpilaw ug nibangga sa naghunong nga taxi mga alas 4 sa kadlawon sa may Barangay Basak Pardo.
Nakaangkon og mga samad ug bun-og si Hinautan sa iyang kamot ug tuhod, samtang ang iyang pasahero nga ihatod unta niya sa Labangon wala ra naunsa.
Si Hinautan niangkon nga nakapiyong siya sanglit tibuok gabii ang iyahang biyahe ug wala pa siya nakapahuway.
Samtang si Lucito Pasaje, 45 anyos, ang drayber sa nabanggaan nga taxi niasoy nga iyang gi-park kadali iyang unit sangĀlit nangihi siya apan dihang mosulod na unta siya og balik, iyang namatikdan si Hinautan nga kusog ang dagan nga niĀderitso sa iyang taxi.
Mga alas 5 pasado sa kabuntagon, laing motorsiklo ang mibangga sa gikasugat nga motor sa may Barangay Poblacion Pardo.
Nagisi ang tuhod ug kamot ni Ed Brandon Panulde, 43, dihang wa na ka kontrol sa iyang brake ug nidumbol sa motorsiklo nga gidrayban sa 26-anyos nga si Mark Joseph Enriquez.
Asoy ni Enriquez nga ni minor siya sanglit dunay usa ka sakyanan nga misud unta sa ilang lane padung sa amihanang bahin apan giingong kusog ang dagan ni Panulde ug kalit kini nga mibangga.
Dihang nabanggaan si Enriquez milahos ang iyang motor sa usa ka sakyanan nga miresulta sa pagkalumping niini. / JDG