2 ka anak patay; inahan kritikal

2 ka anak patay; inahan kritikal
SunStar Local News

Duha ka bata, 9 ug 12 anyos, nangamatay samtang kritikal ang ilang inahan human sila mangadisgrasya samtang nagsakay sa motoriklo nga gimaneho sa ilang amahan niadtong Miyerkules sa gabii, Hulyo 3, 2024 sa Sitio Nangka, Brgy. Sinsin, bukiran sa dakbayan sa Sugbo.

Ang mga biktima giila nga sila si Kathleen Pardillo, 12, ug ang manghod nga si Yuhan, 9, samtang ang kritikal mao ang ilang inahan nga si Cherry Fe, residente sa Sitio Bandila, Brgy. Bonbon.

Luwas ang ilang amahan nga si Herman Pardillo, 47, nagmaneho sa Honda Click ug ang kamanghuran nga si Catriona, 5.

Matod ni Police Captain Joel dela Cerna, hepe sa Malubog Police Community Precinct, nga alas 9:46 sa Miyerkules sa gabii, sakay ang tulo ka mga anak ug asawa sa Honda Click nga gimaneho ni Herman padung sa dakbayan sa Talisay aron mamilar sa haya sa ilang kabanay.

Apan pag-abot sa dulhogon nga bahin sa karsada sa Sitio Nangka, Brgy. Sinsin, giingong wa na mopaak ang brake niini.

Nabangga sila sa gutter sa karsada nga niresulta sa ilang pagkalagpot ug nitugpa sa sementado nga paril.

Tungod sa kakusog sa impact, namatay diha-diha si Kathleen samtang gidali pagdala sila si Herman ug Yuhan, ingon man sila si Cherry Fe ug Catriona sa tambalanan.

Gideklarar nga dead on arrival sa Talisay District Hospital si Yuhan tungod sa dakong kadaut nga naangkon niini sa ulo ug lawas samtang si Cherry Fe gibalhin sa Vicente Sotto Memorial Medical Center tungod kay naa sa talandugon nga kahimtang.

“Kon nakaadto mo anang lugar, daghan na nangadisgrasya ana diha. Nya paglugsong ana nila, dili na daw mopaak ang brake,” matod ni Dela Cerna.

OVERLOADED

Gihulagway ni Dela Cerna nga overloaded ang motorsiklo tungod kay upat ang karga niini ug ikalima na ang driver.

Ang ilang silingan nga nahinabi sa Superbalita Cebu nibutyag nga si Herman lumad nga taga Talisay samtang ang asawa maoy taga Bonbon.

Giingong didto na ang pamilya sa Talisay ug namilar sa haya sa ig-agaw ni Herman sulod sa tulo ka adlaw.

Nibalik lang pagka Miyerkules sa gabii.

Gibadlong na, matod pa, sa mga silingan nga dili dalhon ang mga bata kon mamilar ilabi na nga peligro magbiyahe sa bukid apan wala nipatuo.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph