2 ka armas, shabu nasakmit sa pagronda

2 ka armas, shabu nasakmit sa pagronda
SunStar Local News GPX

Usa ka subject sa search warrant nasikop ug nakuhaan og .357 magnum revolver nga dunay siyam ka mga bala, .38 revolver nga may upat ka mga bala sa cylinder ug usa ka pakite nga shabu sa Sit­yo Mahayahay, Barangay Bangkal sa siyudad sa La­pu-Lapu, alas 5:00 sa buntag, Dominggo, Disyembre 17, 2023.

Ang suspek giila nga si Glenn Booc alyas ‘Mantoy’ nga naila usab pangan nga si Glyn Lee Dehito Booc, 35, ulitawo apan dunay kapuyo ug molupyo sa naasoy nga dapit.

Atol ning pagsuwat, way gibutyag sa kapulisan kon pila ka gramo ang nasakmit nga druga ug balor niini.

Ang kapulisan sa Police Station 3 sa Lapu-Lapu City Police Office (LCPO) nga gipangulohan ni Police Capt. Charlie Ancheta, maoy nihimo sa operasyon ubos sa kamandoan sa ilang station commander nga si Police Maj. Dexter Basirgo.

Uban sa malampsuong o­­pe­­rasyon mao ang PNP Drug Enforcement Group nga gipangulohan ni Police Maj. Al-Nico Hanan.

Ang grupo armado sa search warrant nga giisyu ni Executive Judge Joseph Stephen A. Yhnacio sa Branch 67 sa Regional Trial Court sa Lapu-Lapu.

Ang kapulisan unang nakadawat bahin sa kalihokan sa suspek ug ilang gipanid-an sulod sa pipila ka semana.

Human nasuta nga positibo ang taho, gikuhaan og search warrant sa korte ug gilusad ang naasoy nga operas­yon.

Ang suspek gitanggong karon sa selda sa kapulisan sa Lapu-Lapu ug gikatakda nga pasakaan og tukmang kaso ning adlawa, Disyembre 18, 2023, bahin sa paghupot og armas ug illegal nga drugas.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph