Gitanggong na sa Cebu City Police Office (CCPO) ang duha ka managhigala human nasakpan sa ilang modus nga mangabang og sakyanan dayon iprenda aron nga makakuwarta.
Nadakpan ang duruha sa Tres de Abril, Barangay San Nicolas Proper, Dakbayan sa Sugbo niadtong Hulyo 31, 2025.
Ang duha gihinganlan og Cheska, 29, ug Jenny, 33, nga pulos residente sa Barangay Biasong, Talisay City, Cebu.
Sa inisyal nga imbestigasyon sa Sawang Calero Police Station 6, adunay nakapahibalo sa tag-iya sa sakyanan nga ang iyang unit nga sedan nga mobalor og P879,000, ang naprenda.
Sa dihang nag-abot ang tag-iya ug si Cheska, ang car owner maoy nidala sa maong babaye nga suspek sa police station aron masubay og nganong napunta sa laing tawo ang unit.
Nasayran nga ang cars for rent nagkantidad og P1,500 sulod sa 24 oras, P1,300 kada adlaw kon tulo ka adlaw ang pag-abang, ug P1,200 kada adlaw kon lima hangtod usa ka semana.
Mokabat lang ngadto sa P50,000 ang prenda sa maong unit ngadto sa usa ka Muslim gamit ang peke nga mga dokumento ug natala ang ngalan ni Cheska nga nagpakaaron-ingnon nga maoy tag-iya sa awto.
Kasong carnapping, falsification of documents, ug estafa atubangan sa maong dinakpan. / JDG