Duha ka mga suspetsadong sakop sa notadong Salisi gang nga taga Metro Manila nadakpan sa mga sakop sa Mabolo Police Station sulod sa usa ka bar sa Barangay Kasambagan, dakbayan sa Sugbo, alas 3 sa kaadlawon sa Dominggo, Enero 21, 2023.
Ang mga suspek giila nga sila si Ma. Ann Romano Mantilla, 27, taga 1658 Camino Dela Fe St., Guadalupe Nuevo, Makati City ug Ma. Joplin Barrameda Sison, 28, taga 1718 Skweta St., Taguig City.
Duha sa ilang mga biktima ningreklamo sa Mabolo Police Station nga sila nawad-an og IPhone 14 Pro Max nga mokantidad og P85,000 lakip na ang kwarta nga moabot og P27,000 nga nahanaw samtang sila naa sa sulod sa usa ka bar sa maong barangay niadtong Enero 19, 2023.
Dali nga nihimo og follow-up operation ang kapulisan ug gipangsubay ang kuha sa CCTV camera sa establisemento.
Nasuta nga giigo sila sa duha ka mga babaye nga mga miyembro sa Salisi nunot sa pamaagi sa modus niini.
Apan ang mga suspek ningbalik kini sa maong bar. Nabantayan na sila sa mga security personnel ug dali sila nga nanawag og polis ug gidakop ang duha.
Nakuha pagbalik ang cellphone ug kwarta sa mga biktima sa dihang giadto ang giabangan niini nga balay sa Kasambagan.
Giingong naabot sila sa dakbayan sa Sugbo gikan sa Bacolod City niadtong Huwebes, Enero 18, ug pagka Biyernes, Enero 19, nangigo dayon sila sa sulod sa imnanan sa Kasambagan.