Nadakpan sa mga sakop sa Criminal Investigation and Detection Group (CIDG) Cebu Provincial Field Unit ang duha ka most wanted person, lakip na ang usa ka menor de edad, tungod sa tulo ka count sa kasong pagpanglugos.
Ang operasyon gihimo niadtong Miyerkules sa buntag, Abril 1, 2026, alas 8:15 sa Purok 7, Katikan, Barangay Tapul, Dakbayan sa Talisay.
Giila ang mga dinakpan nga silang alyas Rael, 19, ug Boy, 17.
Ang duha pulos residente sa naasoy nga dapit ug nailhan sab nga Regional Level Number 9 sa listahan sa mga Most Wanted Person.
Kasamtangan na silang gitanggong sa custodial facility sa CIDG 7 sa Camp Sotero Cabahug.
Gilusad sa tracker team sa CIDG 7 ang manhunt operation base sa warrant of arrest nga giluwatan ni Judge Mundlyn Geonzon-Misal-Martin, ang Assisting Judge sa Regional Trial Court (RTC) 7, Branch 65 sa Dakbayan sa Talisay.
Ang warrant giluwatan niadtong Marso 16, 2026, ug walay girekomendar nga piyansa alang sa temporaryong kagawasan sa duha ka suspek.
Ang pagpangdakop kabahin sa Oplan Pagtugis, ang flagship program sa CIDG batok sa mga tawong dunay pending warrant of arrest.
Sumala sa tinubdan gikan sa CIDG 7, duna pa’y lima ka laing akusado sa maong kaso sa pagpanglugos ang gipangita pa sa mga awtoridad.
Sa kinatibuk-ang pito ka mga suspek nga nalutsan og warrant, duha pa lamang ang nasikop sa kapulisan. /