Nangaangol ang duha ka mga construction worker sa dihang nakuryentihan samtang nagtaod og gutter sa atop sa balay nga ilang gipanday.
Base sa imbestigasyon ni Police Sr. Master Sgt. Jim Susvilla sa Borbon Police Station, kini nahitabo sa alas 3 sa Martes sa hapon, Oktubre 17, 2023, sa Sityo Galaban, Brgy. Poblacion, lungsod sa Borbon, amihanang Sugbo.
Ang mga biktima giila nga sila si Enucincio Cañete 33, ug Christian Presillas, 20, pulos mga ulitawo, taga Brgy. Muabog, Tabogon, amihanang Sugbo.
Matod pa nga ang mga biktima nagtaod og gutter sa atop sa balay nga ilang gitrabaho dihang sila nakuryentihan sa high-voltage nga linya sa kuryente hinungdan nga nangatagak.
Ang mga biktima nakaangkon og third degree burns ug gikatakdang ibalhin sa Vicente Sotto Memorial Medical Center.