Duha ang nangamatay sa duha ka managlahi nga mga aksidente sa karsada sa Sugbo nga pulos gikalambigitan sa mga motorsiklo.
Patay diha-diha ang habalhabal drayber alas 12:55 sa kaadlawon sa Martes, Abril 23, 2024 sa national highway sa Barangay Yati, lungsod sa Liloan, amihanang Sugbo, human ni-counterflow ang driver ug nadasmag sa gikasugat nga van.
Ang biktima giila nga si Reynoldo Villanueva Cabiles, 47, ulitawo, taga District 4, Purok Tandang Sora, Brgy. Pulpogan, lungsod sa Consolacion.
Sa nahipos nga kasayuran gikan sa Liloan Police Station ubos sa pagdumala ni P/Maj. Eric Gingoyon nga si Cabiles paingon sa norte nga matod pa kusog nga nakapadagan sa iyang motorsiklo.
Giingong ni-overtake si Cabiles sa gisundan niini nga Toyota Wigo ug nisulod na sa pikas lane hinungdan nga gikasugat ang Isuzu Elf van resulta sa head on collision.
Ang van gimaneho ni Marlon Baiarcal, 26, taga Barangay Talamban, dakbayan sa Sugbo.
Patay diha diha si Cabiles gumikan sa grabeng kadaut sa iyang ulo.
Si Baiarcal kasamtangan nga anaa sa kustodiya sa kapulisan ug atol niining pagsuwat gipaabot nga magkasabot sa kabanay sa namatay.
LAING AKSIDENTE
Namatay usab ang usa ka lalaki nga nagmotorsiklo samtang grabing naangol ang iyang kapuyo nga iyang angkas human sila nadumbolan sa trak nga nagsunod kanila alas 11:50 sa Lunes sa gabii, Abril 22, 2024, sa national highway sa Brgy. North Poblacion, lungsod sa San Fernando, habagatang Sugbo.
Ang namatay giila nga si Mathew Anthony Sarmiento, Padin, 25, ulitawo, inter island seaman, taga Brgy. Bolinawan, Siyudad sa Carcar samtang ang angol giila nga si Stephanie Pontejos Castaño, 28 , dalaga , taga Barangay Basak Pardo, Dakbayan sa Sugbo.
Sa pasiunang imbistigasyon sa kapulisan sa San Fernando Municipal Police Station ubos sa kamanduan sa ilang hepe nga si P/Maj. Mark Anthony A. Villanueva, nasuta sa Superbalita Cebu nga ang mga biktima padong sa Siyudad sa Carcar. Pag-abot sa North Poblacion, ang mga biktima nadasmagan sa nagsunod kanila nga dumptruck nga gimaniho ni Rimboy Alia- Restauro, 28 , ulitawo, taga Barangay Bugho, San Fernando.
Ang mga biktima gidali sa pagdala sa Provincial Hospital, sa Siyudad sa Carcar apan nakabsan sa kinabuhi si Castaño.
Si Restauro na-release ra sa kustodiya sa San Fernando Police human nakab-ot ang amicable settlement tali sa mga kabanay sa mga biktima.