Duha ka mga drug den sa Central Visayas, usa niini sa Dakbayan sa Lapu-Lapu, gironda sa mga sakop sa Philippine Drug Enforcement Agency (PDEA 7) ug kapulisan sa managlahi nga mga operation sa Biyernes Marso 22, 2024.
Unang gibungkag sa PDEA 7 uban sa Station 3 sa Lapu-Lapu City Police Office (LCPO) ang usa ka drug den sa Purok Narra, Brgy. Poblacion, Dakbayan sa Lapu-Lapu alas 11:05 sa buntag sa Biyernes.
Nasikop ang suspetsadong high value target nga giila nga si Ma. Analiza Tanya Alcantara, 40.
Nasakmit gikan kaniya ang duha ka putos sa gituohang shabu nga motimbang og 50 gramos nga dunay estimated average market value nga P340,000, buy-bust money ug improvised tooter.
Pagka alas 5:20 sa hapon sa samang adlaw, ang PDEA Bohol Provincial Office uban sa PNP Bohol, Naval Forces Central ug Tagbilaran City Police Station nilusad sa buy-bust batok sa nagpadagan sa usa ka drug den sa Purok 5, Barangay Dampas, Tagbilaran City.
Tulo ka mga tawo ang nangasikop.
Ang mga suspek giilang sila sila si Nelson Jumarito, 41, janitor, target sa operation ug duha ka mga drug den visitor nga sila si Andre Joseph Cubeta, 40, IT Programmer ug Mark Lester Comiso, 29, promodiser.
Nasakmit gikan kanila ang pito ka putos sa gituohang shabu nga motimbang 7 grams nga mobalor og P47,600, buy-bust money ug drug paraphernalia. (AYB)