Duha ka mga drug personality ang nadakpan sa gilusad nga buy-bust sa mga sakop sa Mambaling Police Station alas 9:35 sa gabii, Dominggo, Mayo 18, 2025, sa Sitio Puwa, Barangay Basak San Nicolas, Siyudad sa Sugbo.
Ang mga suspek giila nga sila si Erwin Fajardo Dela Torre, 37, taga Sitio Panagsama, Barangay Basak San Nicolas nga maoy target sa operasyon ug ang iyang kauban nga si Ariel Morillo Zillo, 51, residente sa Sitio Jumalon, Barangay Basak Pardo.
Nakuha gikan kanila ang mga pinutos sa gituohang shabu nga motimbang sa 5 gramos nga dunay standard drug price nga P34 mil.
Ang mga nakuha nga ebidensya giduso na sa Cebu City Forensic Unit 7 alang sa chemical analysis.
Ang mga sakop sa Mambaling Police Station nipahigayon sa buy-bust human nakadawat og impormasyon nga namaligya og ilegal nga drugas si Dela Torre.
Si Dela Torre mag-atubang og kaso nga kalapasan sa Section 5 Article II, sa Republic Act 9165 kon Comprehensive Dangerous Drugs Act of 2002, samtang si Zillo ang gikiha sa kalapasan sa Section 11 kon illegal possession of illegal drugs ngadto sa korte. / AYB