DUHA ka mga drug personality sa Siyudad sa Tagbilaran ang nangadakpan sa gilusad nga buy-bust sa mga sakop sa Drug Enforcement Team sa Tagbilaran City Police Station alas 3:45 sa hapon, Sabado, Hunyo 28, 2025, sa Purok 3, Manlangit Street, Barangay San Isidro sa maong dakbayan.
Ang mga dinakpan giila nga silang Anthony Jeson Anub, 41, kasamtangan nga nagpuyo sa Barangay San Isidro ug Marlon Palma, 35, lumad nga taga Barangay Cadapdapan, Lungsod sa Candijay, Lalawigan sa Bohol. Nasakmit gikan kanila ang mga pinutos sa gituohang shabu nga motimbang sa 105 gramos nga dunay standard drug price nga P714,000.
Matod ni Lt. Col. John Kareen Escober, ang hepe sa Tagbilaran City Police Station, nga gipaubos nila sa usa ka buwan nga intelligence monitoring ang duha human nigawas ang ilang pangalan nga maoy tigsuplay sa ilegal nga drugas sa maong barangay.
Human nila makuha ang tanang impormasyon, gilusad dayon ang buy-bust nga niresulta sa ilang pagkasikop.
Nakakuha sab sila og kasayuran kon si kinsa ang ilang tinubdan sa ilegal nga drugas nga maoy target sa ilang follow-up operation.
Nigawas sa record sa PNP Bohol nga ang mga suspek nadakpan na kaniadto sa susama gihapon nga kaso. / AYB