DUHA ka mga durogista nga anaa sa drug watch list sa kapulisan ang malampusong nadakpan human nakuhaan sa gituohang shabu atol sa gipahigayon nga Simultaneous Anti-Criminality Law Enforcement Operation kon SACLEO sa Barangay Carreta, Dakbayan sa Sugbo niadtong Hulyo 3, 2025.
Unang nadakpan mga alas 9:50 sa kagabhion si alyas Roger, 29 anyos, walay trabaho ug lumolupyo sa Sitio Laray, Barangay Carreta.
Si Roger nakuhaan og duha ka gagmay nga pakete sa gituohang shabu nga adunay gibug-aton nga 0.15 gramos nga mobalor og P1,020.
Samtang pagka-alas 11 sa gabii susamang petsa, nasikop sab si alyas Ronie, 25, walay trabaho nga residente sa Sitio Ponce 2 sa maong barangay.
Nasakmit gikan kaniya ang tulo ka gagmay nga pakete sa gituohang shabu nga motimbang og 0.20 gramos nga balor og P1,360.
Ang SACLEO gipahigayon sa mga sakop sa Waterfront Police Station ubos sa pagdumala ni Police Major Mark Don Alfred Leanza.
Gisumiter na sa Regional Forensic Unit 7 ang tanang ebidensya nga nakuha alang sa eksaminasyon.
Kasong kalapasan sa Sec. 11, Article II sa R.A 9165 o Comprehensive Dangerous Drugs Act of 2002 ang atubangon sa mga dinakpan. / JDG