Nilungtad og napulo ka oras ang grass fire nga niigo sa dili mominos duha ka ektarya nga baol sa Barangay Colawin, lungsod sa Argao.
Si Cel Jo Zitro, molupyo sa dapit nga nahinabi sa Superbalita Cebu, nagkanayon nga naapektohan sa grass fire ang mga punoan sa lubi, mga prutas ug mga punoan sa kahoy ingon man ang kahoy nga tugas.
Matod ni Zitro, pasado ala 1:00 sa Sabado, Abril 20, 2024, nangayo og tabang sa Superbalita Cebu pinaagi sa Facebook Messenger, nga nagkinahanglan sila og bombero tungod sa dakong grass fire sa Colawin.
Apan wa dayon makarespondi ang mga bombero sa Argao tungod usab sa ilang pagtubag og alarma sa sunog sa usa ka balay sa Bulahan, Brgy. Media Poblacion sa Argao diin dunay 79 anyos nga babaye nga si Carmelita Montejo ang nakalas sa maong sunog.
Mao kini hinungdan nga ang mga molupyo sa Colawin nagtinabangay sa pagpawong sa grass fire nga mapugngan nga di makaabot sa kabalayan gamit ang mga container sa tubig ug gabii na niabot ang mga bombero sa Argao.
Hinuon, matod ni Zitro, layo ra og balay ang maong baol nga naigo sa grass fire ug nahingpit sa pagkapalong mga alas 10:00 na sa gabii.
Ang grass fire nagsugod sa baol sa usa ka Tomasa ug nakatapon sa baol ni Ninay Livy Eltagunde apan wa pa masuta kon nganong nasunog ang mga sagbot sa baol.
Samtang, alas 8:00 usab sa gabii sa samang adlaw, dunay gamay nga grass fire nga niigo sa Upper Talo-ot, Argao apan napawong dayon kini sa mga residente sa dapit.
Sunodsunod na ang nahitabo nga sunog sa kasagbotan sa habatagan sa Sugbo nunot sa kainit sa adlaw ug huwaw mugna sa El Niño phenomenon. / DVG