Gipanghimakak sa duha ka establisemento sa Sugbo ang pasangil nga nalambigit sila sa scam nga gipakita sa usa ka viral nga video sa YouTube nga gi-upload niadtong Dominggo, Mayo 18, 2025.
Ang maong video nga molungtad og 22 minutos, nangangkon nga nagpakita kini og real-time nga CCTV footage sa usa ka grupo nga naghimo og investment scam nga nag-operate sa ikaduhang andana sa Skyrise 1 sa Cebu IT Park.
Ang video nagpakita sab sa grupo nga gituohang maoy nalambigit sa pagpangilad online.
Isip tubag, ang Skyrise pinaagi sa ilang legal counsel nga MN Law, hugot nga nanghimakak sa bisan unsang kalambigitan.
Ang kompaniya niingon nga nagpahigayon sila og internal investigation ug nasuta nga ang mga tawo nakita sa video wala mag-abang og opisina sa Skyrise 1 o sa bisan unsang property sa Skyrise.
Samtang ang Garden of Envy, usa ka resturant ug pribadong lugar alang sa mga kalihukan nga nahimutang sa ground floor sa The Gallery building nga gihisgutan sa video, nihimakak sab sa bisan unsang kalambigitan sa operasyon.
Ang management sa resturant nisang-at og pormal nga report sa Criminal Investigation and Detection Group (CIDG) ug nakig-coordinate direkta kang PLtCol Jerick A. Filosofo.
Usa ka CIDG team ang nibisita sa lugar kagahapon ug nilusad og imbestigasyon. / DPC