Naka-qualify na alang sa 2024 Paris Olympics ang Filipina boxers nga sila si Nesthy Petecio ug Aira Villegas human sila nakaposte og laing kadaugan batok sa tagsa-tagsa nila ka kontra ning Martes, Marso 12, 2024 (PH time) sa 1st Olympic Qualifying Tournament sa Busto Arsizio, Italy.
Si Petecio nilupig kang Esra Yildiz sa Turkey, 4-1, nga nagtukmod kaniya sa finals sa 57kg category samtang si Villegas nidominar kang Zlatislava Chukanova sa Bulgaria, 5-0, nga nagduso kaniya sa semi-finals sa 50kg weight class.
Sa kategoriya ni Petecio, ang finalists lang ang maka-qualify sa Olympics samtang ang semi-finalists sa kategoriya ni Villegas.
Ning puntoha, unom na ka mga atleta sa Pilipinas ang nakabaton og puwesto sa Paris Games. Ang unang Pinoy nga mga atleta nga nakabuhat niini mao sila si boxer Eumir Marcial, pole vaulter EJ Obiena, ug gymnasts Carlos Yulo ug Aleah Finnegan. / ESL