Walo ka ektarya ang naapektuhan sa duha ka mga grass fire sa habagatan sa Lalawigan sa Sugbo niadtong Miyerkules, Abril 17, 2024.
Unang alarma sa grass fire sa sityo Lower, Brgy. Magcagong, usa ka bukirang dapit sa lungsod sa Sibonga, alas 4:00 sa hapon.
Napalong ang kayo sa mga bombero uban sa pag-abag sa katawhan sa dapit sa pagka alas 7:00 sa gabii.
Si P/Staff Sgt. Reginar Templanza, sa interview sa Superbalita Cebu, niingon nga kapin sa lima ka ektarya ang nasunog sa luna nga gipanag-iya sa ilang kabanay.
Matod ni Templanza, ang tulo ka oras nga grass fire nakaapekto sa 100 ka punoan sa lubi, 50 ka punoan sa saging, daghang kawayanan ug uban pang mga tanom sa umahan.
Wa pay opisyal nga resulta sa imbestigasyon bahin sa sunog apan nagduda si Templanza nga dunay nagdaub sa ilang umahan apan wa nila masayri kon si kinsa ug daling nikaylap tungod sa kauga sa palibot.
Atol ning pagsuwat, ang kabumberohan wala mopagawas kon pila ang kantidad sa danyos.
SAN FERNANDO
Pagka alas 8:00 sa gabii sa samang adlaw, laing grass fire niigo sa Barangay San Isidro, Lungsod sa San Fernando, habagatang Sugbo.
Nilungtad usab og tulo ka oras ang sunog human napalong sa kabumberohan uban sa pag-abag sa katawhan sa dapit sa alas 11:02 sa gabii.
Base sa pasiunang imbestigasyon ni P/Staff Master Sgt. Herbert Longakit Pananganan sa San Fernando Police Station ubos sa kamandoan sa ilang hepe nga si P/Maj. Mark Anthony Ansino Villanueva, dunay gamay nga bahin sa sam-ang sa dapit ang apektado sa grass fire.
Sa pasiunang imbestigasyon usab sa kabumberohan sa maong lungsod pinaagi sa ground commander nga si F/Sr. Insp. Constancia June C. Agustin, ang grass fire nagsugod sa ibabaw nga bahin sa maong dapit.
Dali nga nikaylap ang kayo gumikan kay bungtod ang dapit ug kusog ang hangin.
Matod ni Agustin, ang mga aligato nanglugpad ug inigtugpa sa mga uga'ng sagbot, mosilaub na usab kini tungod sa paghuros sa hangin.
Dason niya nga dili mominos sa tulo ka ka ekterya ang naapektuhan sa grass fire nga napasaka ngadto sa 4th alarm hinungdan sa pagpangabot sa mga bombero gikan sa ubang kalungsoran ug dakbayan.
SUNODSUNOD
Namatikdan nga nagsunodsunod ang grass fires sa Sugbo, labina sa pagsulod sa panahon sa ting-nit nga napasamot tungod sa El Niño phenomenon.
Sa Sitio Siningbahan, Barangay Colawin, lungsod sa Argao niadtong Abril 10, 2024, ang grass fire nakaapekto sa halos tulo ka ektarya nga yuta.
Niadtong Sabado, Abril 6, gibana-bana nga 70 ka ektarya ang nasunog sa kabukiran sa habagatang lungsod sa Oslob nga nakaapekto sa Barangay Poblacion, Cañang, Calumpang ug Daanlungsod.
Sa samang adlaw, laing grass fire ang gitaho sa Purok Tambis, Barangay Magcagon sa lungsod sa Sibonga, nga nakaapekto sa usa ka umahan.
Niadtong Dominggo, Abril 7, usa ka grass fire ang gikataho’ng miigo sa South Hills sa Barangay Tisa, dakbayan sa Sugbo.
Niadtong Martes, Abril 9, usa ka grass fire ang miigo sa campsite sa Mt. Kan-irag sa Barangay Sirao, dakbayan sa Sugbo, samtang laing grass fire niulbo sa Ajoya Subdivision sa siyudad sa Lapu-Lapu. / DVG