Duha ka gikatahapan nga mga gun runner nangadakpan sa managlahi nga mga entrapment operation sa mga sakop sa Criminal Investigation and Detection Group (CIDG) Mandaue City Field Unit atol sa Pasko sa Pagkabanhaw, Marso 31, 2024.
Unang operation gipahigayon sa Brgy. Centro, Mandaue City, alas 9:30 sa buntag sa Dominggo nga niresulta sa pagkasikop sa ilang target nga si Rigan Gomez Caleza, 38, taga Brgy. Maslog, dakbayan sa Danao.
Nakuha sa posisyon sa suspek ang usa ka kalibre .22 nga revolver nga way serial number, lakip na ang kwarta nga maoy gigamit sa pagpalit sa usa ka police decoy kang Caleza.
Pagka alas 11:30 sa buntag sa susamang adlaw, laing lalaki nga namaligya usab og paltik nga armas nadakpan sa buy-bust sa Brgy. Alegria, lungsod sa Cordova.
Ang nadakpan giila nga si Raniel Guasin Potot, 51, lumolupyo ra usab sa maong lugar.
Nakuha sa mga polis ang usa ka kalibre .45 nga pistola, lakip na ang steel magazine niini.
Matod ni Police Major Nigel Sanoy, hepe sa CIDG Mandaue City Field Unit, nga taudtaod na nila nga nadawat ang impormasyon labot sa kalambigitan sa duha sa pagpamaligya og armas nga walay lisensya.
Komprahon sa duha ang maong armas gikan sa mga tiggama og paltik sa dakbayan sa Danao ug ilang ibaligya niadtong nangita niini.
Dugang ni Sanoy nga kon magkaduol na ang eleksiyon mao usab kini ang ilang negosyo. / AYB