Duha ka mga high value individual ang nadakpan sa mga sakop sa PNP Drug Enforcement Group 7 atol sa gilusad nga buy-bust alas 11:53 sa gabii, Biyernes, Hunyo 27, 2025 sa Sityo Hika, Purok Talisay, Barangay Población, Lungsod sa Compostela, Probinsya sa Sugbo.
Ang mga nadakpan giila nga silang Lionel Jayme alyas Mingoy, 34, taga Guimbal, Barangay Canamucan, Lungsod sa Compostela ug Joel Lawas, alyas Jojo, 50, nga nagpuyo ra usab sa maong dapit.
Nakuha sa mga operatiba ang mga pinutos sa gituohang shabu nga motimbang og 55 gramos nga dunay standard drug price nga P374,000.
Matod sa usa sa mga operatiba sa PDEG 7 nga usa ka semana nga gipaubos nila sa monitoring ang duha ka mga suspek human nigawas ang ilang pangalan nga nalambigit sa pagpamaligya sa ilegal nga drugas.
Human makuha ang tanang impormasyon gilusad dayon ang buy-bust sa pakig-alayon sa Compostela Municipal Police Station, Regional Intelligence Unit 7, Coast Guard Intelligence Group Central Visayas, ug PDEA-7 nga niresulta sa malampuson sa pagkasikop sa duha.
Niadtong Oktubre 2022 nadakpan na sa kapulisan si Jayme sa kaso gihapon sa ilegal nga drugas ug nakagawas pagka Abril 2025 ug nibalik sa pagpamaligya.
Ang iyang area sa disposal mao ang tibuok Lungsod sa Compostela ug mga silingang lungsod sa Lalawigan sa Sugbo.
Kalapasan sa Section 5 ug 11, Article II, Republic Act 9165 ang ipasaka sa kapulisan batok sa maong mga suspek samtang ang ebidensya nga ilang nasakmit giduso na kini sa PNP Forensic Unit 7 alang sa himuon nga chemical analysis. / AYB