Duha ka drug personalities nga nabutang sa listahan isip mga high value individual ang nasikop sa managlahi nga buy-bust sa kapulisan sa miaging semana.
Unang nadakpan sa mga sakop sa Carbon Police Station sa alas 2:45 sa kaadlawon sa Biyernes, Abril 11, 2025, sa Sitio Bato, Barangay Ermita, Dakbayan sa Sugbo, mao si Ian Joy Villarta Lanit alyas Joy, 34, taga Junquera Street, Barangay Kalubihan, Dakbayan sa Sugbo.
Nasakmit gikan kaniya ang mga pinutos sa gituohang shabu nga motimbang sa 10 gramos nga nagkantidad og P68 mil.
Sa alas 3:55 sa hapon sa Dominggo, Abril 13, 2025, nadakpan sa mga sakop sa Inayawan Police Station ang usa ka high value individual sa Sitio Riverside, Barangay Bulacao, Dakbayan sa Sugbo.
Ang suspek giila nga si Welvin Jurado Flores alyas Aba, hingkod ang pangedaron nga nagpuyo ra sab sa maong lugar.
Nasakmit sa mga sakop sa Station Drug Enforcement Team sa Inayawan Police Station ang mga pinutos sa gituohang shabu nga motimbang sa 15.32 gramos nga dunay standard drug price nga P104,176 ug usa ka kalibre 38 nga pistola nga dunay tulo ka bala.
Sigon sa usa sa mga operatiba sa Inayawan Police Station nga si Flores nadakpan na niadtong Nobiyembre 16, 2022, sa kaso sa ilegal nga drugas. / AYB