Duha ka technicians sa usa ka cable installation services nga nag-provide og internet connection ang naaktuhan nga nagkuha og linya sa internet nga dili ilahang provider sa Sitio Riverside, Barangay Poblacion Oriental, Lungsod sa Consolacion, Cebu alas 12:30 sa hapon niadtong Huwebes, Agusto 20, 2026.
Ang mga suspek giila nga sila si Glenier Portes Morre, 27, taga Barangay Cogon, lungsod sa Compostela ug ang iyang silingan nga si Carl Allain Juntilla Pepito, 23, pulos empleyado sa usa ka cable installation services.
Sa imbestigasyon sa Consolacion Municipal Police Station, nasuta nga samtang nag-roving ang duha ka mga trabahante sa Globe Telecom nga silang Felipe Dejeto Jr, 37, ug Marvin Maghais, 34, pulos taga Talamban, Cebu, ilang naatlan ang duha nga nang-install og internet connection paingon sa balay nga ilang customer.
Dako na lang ang kakurat nilang Dejeto ug Maghais nga ang gi-connect sa mga suspek mao man ang ilang fiber optic cable diin sila ang nag-supply sa internet.
Ila dayon ning gisita ug gidala sa police station ug niangkon ang duha sa salaod nga ilang nahimo.
Kalapasan sa Republic Act 10515 kun ang Anti-Cable Theft and Cable Act of 2013 ang ipasaka nga kaso batok sa duha ka mga suspek. / AYB
