Nasakpan sa akto ang duha ka mga lalaki nga ninglungkab sa balay sa usa ka negosyante sa Barangay Catarman, Lungsod sa Liloan, amihanan sa Sugbo, Martes sa kaadlawon, Agusto 13, 2024.
Ang mga suspek giila lang sa mga pangalan nga Renato, 23, ug Sesmundo, 37, pulos taga Liloan apan sa managlahing barangay.
Balay sa usa ka 'Anita' ang gisaka sa maong mga kawatan atol nga wala ang tagbalay.
Maayo na lang nga adunay mga sakop sa barangay tanod nga nag-roving niadtong higayona sa dihang usa ka concerned citizen ang nakamatikod nga adunay kasikas sa balay ni Anita bisan nga wa diha ang tag-iya.
Wa masayop ang maong ‘marites’ nga silingan sa iyang pagduda sa dihang naatlan nga gibitbit na ang mga appliance sa maong mga suspek sama sa flat-screen TV ug ang component sound system.
Nasayran sa Liloan Police Station ubos sa pagdumala ni Police Major Charlie Santiago nga ang duha ka mga kawatan miagi sa comfort room human nila giguba ang rehas diha sa bintana.
Ang mga dinakpan anaa na sa kustodiya sa Liloan Police Station./DVG