Gikiha na sa Mabolo Police Station ang duha sa tulo ka mga Korean national nga nalambigit sa pagpanulis sa usa ka Koryana sa Maria Luisa Subdivision sa Barangay Banilad, dakbayan sa Sugbo niadtong Martes sa gabii, Abril 2, 2024, ug nakigpinusilay sa mga polis nga ningresponde sa alarma, usa kanila ang napatay.
Matod ni Police Major Romeo Caacoy Jr., hepe sa Mabolo Police Station, gipasakaan nila sa Huwebes hapon, og kasong robbery with homicide, frustrated homicide ug direct assault sila si Yong Hee Kim, 45, ug Jun Hee Kim, 49 sa Cebu City Prosecutor’s Office.
Niluwat na og pinanumpaang pamahayag ang biktima nga negosyanteng Koryana, lakip na sa mga saksi sa krimen, ug duna na silay natigom nga mga dokumento alang sa gipasaka nga kaso.
Nipasabot si Caacoy kon nganong robbery with homicide ang ilang gipasaka sa duha sanglit duna may usa nga namatay bisan kon ila kining kauban nga si Sun Yong Choi, 47, nga maoy namusil sa mga polis nga niresulta sa pagkaangol sa usa ka police staff sergeant nga sakop sa Regional Intelligence Unit 7.
Hinuon, luwas na ang kahimtang sa polis.
Makig-alayon ang Mabolo Police Station sa ubang mga ahensiya sa gobiyerno aron makakuha og dugang background sa mga suspek.
Nahinabi na usab sa usa ka Korean consul ang duha dungan sa pagbutyag nga mohatag sila sa mga report nga kinahanglanon sa kunsalado.
Nasagmuyo ang gobyerno sa South Korea sa gihimo sa ilang citizen sa Sugbo ug nipakita og kasubo sa nahitabo sa polis nga naangol sa insidente.
“Ang atong nakita nila is medyo nasagmuyo sila ug naluoy pud sila sa polis nato nga nasamdan, mipakita sad silag simpatiya,” matod ni Caacoy.
Gihulagway hinuon ni Caacoy nga isolated ang maong krimen nga naglambigit sa mga Korean national.
Giingong wala magbase sa dakbayan sa Sugbo ang tulo ka mga Koryano sanglit didto kini namuyo sa kaulohan. / AYB