2 ka lalaki samdan sa pagpamusil

2 ka lalaki samdan sa pagpamusil

Duha ang samdan sa managlahing insidente sa pagpamusil sa dakbayan ug lalawigan sa Sugbo.

Usa ka 23 anyos nga lalaki ang gipusil alas 4:20 sa hapon, Dominggo, Hunyo 23, 2024, sa Sitio Silangan 2, Barangay Tejero, dakbayan sa Sugbo.

Ang biktima giila sa alyas nga “Jefferson” nga nagpuyo ra usab sa maong lugar nga samaran sa iyang walang nawong, apapangig ug tuong abaga.

Matod sa mga nakasaksi sa hitabo, samtang naghigda-higda ang biktima sa gawas sa ilang balay kilid sa karsada, kalit nibutho ang wala mailhing mamumuno ug gipusil kini makatulo ka higayon.

Human sa pagpamusil dali usab nga nisibat ang mamumuno samtang ang biktima gidala sa iyang mga igsuon sa Cebu City Medical Center (CCMC) sakay sa taxi.

Ang Waterfront Police Station padayon pa sa ilang imbestigasyon ug pagsubay sa motibo sa maong pagpamusil.

TABOGON

Lalis sa managhigala nisangko sa pagpamusil sa Purok Ibabao, sa Brgy. Daantabogon, lungsod sa Tabogon, amihanan sa Sugbo, alas 9:30 sa gabii, Sabado, Hunyo 22, 2024.

Ang biktima giila nga si Jay Gidacan, 28, ulitawo nga may kapuyo ug molupyo sa naasoy nga dapit.

Samtang ang suspek nga iyang silingan giila nga si Fernando Garcia Jr., 41, ulitawo.

Sa follow up sa Superbalita Cebu, nahibaw-an sa pasiunang imbestigasyon sa kapulisan sa Tabogon ubos sa kamandoan sa ilang hepe nga si P/Capt. Florencio Cabanlit Jr. nga ang managhigala nag-estambay sa payag-payag.

Ang mga molupyo sa dapit kalit nakadungog og buto sa armas ug sa ilang pagsusi, ang biktima nangayo’g tabang nga may samad na sa iyang liog kay gipusil siya sa suspek.

Ang biktima gidali sa pagdala sa rescuer sa Tabogon sa Provincial Hospital sa Siyudad sa Bogo, Sugbo apan gibalhin sa usa ka ospital sa dakbayan sa Sugbo.

Ang suspek nisibat apan sa hot pursuit, nadakpan alas 5 sa buntag, Dominggo, Hunyo 23, 2024, sa ilang balay ug na-recover ang 9mm pistol nga snub-nosed nga revolver.

Ang kapulisan nagduda nga ang motibo sa pagpamusil bahin sa illegal drugs sanglit ang suspek nadakpan na sa kaso sa drugas sa 2018 ug nakagawas niadtong 2022.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph