Duha ka mga Polish national ug Pinoy nangaangol sa aksidente sa motorsiklo sa Sityo Lugsangan Road, Barangay Tabon, lungsod sa Dalaguete, habagatang Sugbo sa alas 6:55 sa gabii, Huwebes, Abril 18, 2024.
Mga biktima nga Polish national giila nga sila si Moczulski Piotr, 39, ulitawo, nagmaneho sa Honda Click ug ang iyang angkas nga si Korniluk Daniel, 38, ulitawo.
Samtang ang laing naangol nga nagmaniho sa laing motorsiklo nga Suzuki Smash giila nga si Victor Apostol, 39, minyo, taga Sitio Lugsangan, Brgy. Tabon. Ang mga angol gipangdala sa Bogo Argao District Hospital.
Kini nga kasayuran nakuha sa Superbalita Cebu gikan sa pasiunang imbestigasyon sa kapulisan sa Dalaguete ubos sa kamandoan sa ilang hepe nga si P/Maj. Clemente Ceralde Jr.
Sumala sa kapulisan nga ang duha ka mga langyaw nidasmag ngadto sa motorsiklo nga gimaneho ni Apostol nga niresulta sa ilang pagkaangol.
Sila gitabang sa mga sakop sa Dalaguete Municipal Disaster Risk Reduction and Management Office (MDRRMO) ug gidala sa tambalanan. / DVG