Gipasidan-an sa duha ka dapit sa habagatang bahin sa Sugbo ang ilang mga residente sa pagbantay sa posibling pagbuto sa Mt. Kanlaon nga gipasaka sa Level 3 ug nagpakita sa pagtaas sa magmatic unrest.
Apan ang Environmental Management Bureau (EMB) 7 niadtong Martes, Abril 8, 2025, nitaho nga ang kalidad sa hangin sa Central Visayas nagpabilin sa acceptable level.
Ang Dakbayan sa Toledo nahimutang sa habagatang bahin sa Probinsiya sa Sugbo nga nag-atubang sa Isla sa Negros.
Ang Toledo City Public Information Office (PIO) nagpagawas og opisyal nga pasidaan niadtong Martes, Abril 8, nga nag-awhag sa pagkaalerto tungod sa pagtala sa 14 ka mga linog sa bulkan ug usa ka sulfur dioxide flux nga 1,655 ka tonelada sa Mt. Kanlaon sa Dakbayan sa Canlaon, Negros Oriental.
Kini giubanan sa pagkausab sa porma sa yuta nga gikonsiderar nga kritikal nga mga timailhan sa nagpadayon nga kalihukan sa bulkan.
Ang Toledo City PIO nitambag sa mga lumolupyo nga magbantay sa peligro sama sa pagbuto, pag-agos sa lava ug magpabilin nga updated sa mga pahibawo sa lokal nga kagamhanan.
Samtang nipasidaan usab ang Municipal Disaster Risk Reduction Management Office (MDRRMO) sa Alegria ngadto sa mga lumolupyo nga bisan layo ang lungsod sa bulkan, posible ang pag-ulan sa abo depende sa direksyon sa hangin ug mga kondisyon sa panahon.
Ang mga lumolupyo sa Alegria giawhag nga magpabilin sa sulod sa balay, magsul-ob og face mask kon mogawas, tabunan ang mga tinubdan sa tubig, ug sigurohon ang mga kahayupan.
Ang bisan unsang nakita nga pag-ulan sa abo, baho sa asupre, o dili kasagaran nga mga epekto sa panglawas kinahanglan nga i-report sa MDRRMO.
Samtang ang EMB 7 ni-report nga ang kalidad sa hangin sa Central nga Visayas nagpabilin sa acceptable level human sa pagbuto sa Mt. Kanlaon nga nihimo og 4,000-metro nga abo nga napadpad sa habagatang bahin.
Si Engr. Cindylyn Pepito-Ochea, hepe sa Environmental Education and Information Unit sa EMB-7 niingon nga ang direksyon sa hangin sa habagatang bahin nagdala sa bisan unsang potensyal nga epekto padulong sa Negros Occidental.
Ang mga monitoring station sa Mabigo, Dakbayan sa Canlaon (Negros Oriental), Toledo, ug Mandaue (Sugbo) naka-rekord sa sulfur dioxide (SO2) ug particulate matter (PM10 ug PM2.5) nga concentration, nga na sulod sa acceptable limit sa Abril 8.
Ang monitoring station sa Mabigo nahimutang duol sa evacuation center, mga 10 ka kilometro gikan sa Mt. Kanlaon.
Dugang nga pagmonitor gihimo sa mga Dakbayan sa Toledo ug Mandaue.
Gipamatud-an sa EMB 7 nga ang direksyon sa hangin naaglihok sa habagatang bahin nga nitugma sa report sa Phivolcs nga ang pag-ulan sa abo mahitabo sa Negros Occidental. / CDF