Gibantayan pag-ayo sa weather bureau ang duha ka low-pressure area (LPAs), nga adunay usa nga posibleng mokusog ngadto sa tropical cyclone nga mahimong magdala og kusog nga ulan sa Northern Luzon sa hinapos sa semana, sugod sa Septiyembre 26, 2024.
Ang unang sistema, nga nahimutang kapin sa 2,700 kilometros silangan sa Central Luzon, nagpabilin sa gawas sa Philippine Area of Responsibility (PAR).
Sumala sa Pagasa weaher bureau, posible nga kon makasulod sa nasod apan molambo lang kini sa mahinay nga bagyo sa sulod sa mosunod nga 24 ngadto sa 48 ka oras samtang nag-irog padulong sa North Pacific
Ang ikaduhang weather disturbance, panagtapok sa bagang panganod sa PAR gibantayan usab diin dunay ubos nga posibilidad nga mahimong bagyo, apan dakong posibilidad nga molambo ngadto sa LPA sa mga mosunod nga adlaw.
Sa laing bahin, ang Inter-Tropical Convergence Zone (ITCZ) padayong nakaapekto sa Palawan, Visayas, ug Mindanao, nga nagdala og madag-umon nga kalangitan ug bulag nga pag-ulan.
Matod ni Pagasa Visayas Chief Engr. Alfredo Quiblat Jr., ang Dakbayan sa Sugbo gipaabot nga makasinati og panagsang mapanganuron nga kalangitan inubanan sa pat-ak pat-ak nga pag-ulan tungod sa ITCZ.
Samtang wala’y dinaliang hulga sa grabe nga panahon, apan ang localized thunderstorms posible sa hapon ug gabii.
Ang ITCZ usa ka weather pattern diin magtagbo ang hangin sa amihanan ug habagatang bahin sa kalibutan, nga moresulta sa pagdaghan sa pag-ulan ug pagpanugdog-kilat.
Ang mga residente sa Mindanao, partikular na sa Zamboanga Peninsula, Northern Mindanao, ug Caraga, gitambagan nga mangandam alang sa localized thunderstorms ug katag-katag nga pag-ulan sulod sa mosunod nga 24 oras.
Samtang nagsingabot ang unang LPA, gipaabot ang baluron nga kadagatan sa palibot sa Northern Luzon, ilabi na duol sa Batanes ug Cagayan.
Ang Pagasa nipasidaan sa posibleng gale warning sa weekend, nga makabalda sa biyahe sa kadagatan sa gagmayng mga barko. / JBB