2 ka magsuon nanglimpyo sa atabay, nangamatay

2 ka magsuon nanglimpyo sa atabay, nangamatay
Bohol map. (SunStar photo)

Nangamatay ang duha ka mga magsuon human nga wala na makaginhawa samtang nanglimpyo sa atabay sa Sitio Maasin, El Salvador lungsod sa Carmen, Bohol alas 8:30 sa Dominggo sa buntag, Hulyo 7, 2024.

Ang mga biktima giila nga sila si Freddie Estrosas, 28, ug maguwang nga si Franklyn, 33, pulos mga lumolupyo sa maong lugar.

Matod ni Police Lieutenant Col. Mark Gifter Sucalit, deputy provincial director for operations ug kasamtangan nga Provincial Mobile Force Company commander, nanglimpyo sa atabay nga dunay giladmon nga kapin sa 10 metros ang manghod nga si Freddie.

Naglisud na siya sa pagginhawa nga tungod niini, nisinggit kini og pakitabang sa iyang igsuon samtang naa sa sulod sa atabay.

Human masayod sa nasinati sa iyang manghod, ni-rescue si Franklyn ug nidali sa pagkanaug sa atabay apan sa iyang pagkanaug, kini na usab ang gitabang tungod kay naglisud na usab sa pagginhawa.

Nilanat pa ngadto sa 30 minutos una nadiskubrehan ang duha sa ilang mga silingan nga dili na makaginhawa ang managsuon sa ilawom sa tabay.

Ang mga silingan nanawag sa Tarsier 117 aron ma-rescue ang magsuon ug gidali sa pagdala sa Cong. Simeon Toribio Memorial Hospital apan gideklarar nga dead on arrival ni Dr. James Gabriel Salarda.

Sa unang pagduda sa mga residente dunay methane gas ang atabay apan nasuta nga lisod lang ang oxygen sa sulod nga usa sa hinungdan nga dili na sila makaginhawa.

“Taas kaayo nang 10 meters. Kinahanglan na ka anang oxygen. Wala mi nakita’ng foulplay sa ilang kamatayon,” matod ni Sucalit.

Wala na motugot ang pamilya nga mapaubos sa autopsy ang lawas sa magsuon. / AYB

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph