Nangapaig ang duha ka mga managsuong gihulagway nga mga “special children” sa pagkasunog sa ilang balay ala 1:50 sa kaadlawon sa Martes, Disyembre 26, 2023 sa Brgy. Poblacion, lungsod sa Sibonga.
Ang mga biktima giila nga mao sila si Kyle Geronimo, 25, ug Fernando Geronimo, Jr., 26. Ang ancestral home gipanag-iya ni Lilibeth Geronimo, 52.
Si Police Corporal William Favillar, sa Sibonga Police station nga nahinabi sa Superbalita Cebu pinaagi sa telepuno nagkanayon nga kandila ang hinungdan sa sunog basi sa ilang investigation uban sa Bureau of Fire Protection (BFP) sa Sibonga.
Matod ni Favillar nga ang mga biktima diha sa ilang lawak dihang nag-brownout alas 11 sa gabii hinungdan nga naggamit sila og kandila samtang nangatulog.
Wa pa nasubay kon kinsa ang nihatag og kandila.
Ang managsuon gilain sa pagpakatulog sa usa ka lawak.
Sa kalit lang, niulbo ang kayo sa kwarto sa mga biktima ug wa na sila nakuha tungod sa karatol sa mga sakop sa pamilya.
Si SFO1 Japeth Legrado, imbestigador sa Sibonga BFP nga nahinabi sa Superbalita Cebu, nagkanayon nga ang sunog ilang giisa sa 1st alarm.
Duha nila ka mga firetruck nagtinabangay sa pagpawong sa kayo nga nakontrolar alas 2:50 sa kaadlawon ug hingpit nga napawong alas 5:30 sa buntag.
Naangol si Abraham Cañazares, 51, uyoan sa mga biktima.
Ang danyos gibana-bana nga mokabat og P200,000.
Gipasabot ni Legrado nga tungod kay karaan kaayo ang balay ug gama sagad sa kahoy, dali’ng nikatap ang kayo.